Թուրքիոյ մէջ երեք ամսուան ժամկէտով «Պարէտային ժամ» յայտատարուեցաւ: Այս մասին յայտատարութիւնը կատարուեցաւ Թուրքիոյ նախագահ Էրտողանի կողմէ: Նշենք նաեւ, որ Էրտողան ժամեր առաջ խօսած էր «Ալ Ճազիրա» կայանին: Ան ըսած էր, որ երկրին մէջ եղած յեղաշրծման մասին լուրը ինք ստացած է իր փեսայէն եւ ան իր գործակիցներուն հետ միասին աշխատելով յաջողած է 12 ժամուան ընթացքին ձախողութեան մատնել զինուորական յեղաշրջման փորձը:
Ակօս Թերթի համաձայն, 15 Յուլիսի ձախողած յեղաշրջումի փորձէն ետք Թուրքիոյ տարածքին բազմահազար պետական պաշտօնեաներ գործազրկուած են։ Զանազան նախարարութիւններէ եւ պետական կառոյցներէ դուրս հանուած պաշտօնեաներու թիւը հասած է 55 հազար 578-ի։ Մաքրագործման մեծագոյն հոսանքը կայացաւ Կրթական նախարարութեան շրջանակներուն մէջ։ Նախարարութեան կազմին մէջ պաշտօնավարող 15 հազար 200 անձեր գործազուրկ եղած են։ Միւս կողմէ յատուկ դպրոցներուն մէջ ուսուցչագործող աւելի քան 21 հազար ուսուցիչներ ալ կորսնցուցած են իրենց ուսուցչագործելու արտօնութիւնը։ Բոլոր այս գումարին վրայ Չորեքշաբթի օր եւս 6 հազար 538 ուսուցիչներ դուրս մնացած են իրենց ծառայութենէն։ Այս տուեալներով պաշտօնանկ եղած ուսուցիչներուն ընդհանուր թիւը կը հասնի 42 հազար 731-ի։ Բարձրագոյն ուսման խորհուրդն ալ իր կարգին հրաժարելու հրաւիրեց բոլոր պետական եւ հիմնադրամային համալսարաններու տեսուչները։ Այսպէսով պետական համալսարաններու 1.176 եւ յատուկ համալսարաններու 401 տեսուչներ հրաժարեցան։
Նման հրաժարումներ պատահած են արդարադատական համակարգէն ներս ալ։ Հոս ալ բազմաթիւ դատաւորներ հսկողութեան տակ առնուած կամ պաշտօնազրկուած են։ Նոյնպէս մաքրագործումը թափանցած է բանակի շարքերուն եւ բիւրաւոր սպաներ հեռացուած են բանակի շարքերէն։ Մինչեւ թերթիս տպարան յանձնուած պահուն ձերբակալուած էին 43 ոստիկաններ եւ 121-ն ալ հսկողութեան տակ առնուած։ Հսկողութեան տակ առնուած դատախազներու եւ դատաւորներու թիւը հասած է 1.005-ի, որոնցմէ 587 արդէն ձերբակալուած։ Չեն բացառուած նաեւ զինուորական դատախազները եւ դատաւորները։ Պաշտպանութեան նախարարութեան փոխանցած տեղեկութեամբ ռազմական արդարադատութեան մէջ ծառայող ողջ անձնակազմը հարցաքննութեան ենթարկուած է եւ անոնցմէ 262-ը արդէն պաշտօնազրկուած։
