Հարաւային Գալիֆորնիոյ Հայկական Կրթական Բարեսիրական Միութիւնը, անցեալ Հինգշաբթի, Սեպտեմբերի 16ին, 2010, Փասատինայի իր կեդրոնին մէջ, ընդունելութիւն մը սարքած էր ի պատիւ Դամասկոսի Թեմի առաջնորդ` Գերշ. Տ. Արմաշ Եպս. Նալպանտեանի :
Արմաշ Սրբազանը յատկապէս Լոս Անճելոս ժամանած էր Արեւմտեան Թեմի առաջնորդ Գերշ. Տ. Յովնան Արք. Տէրտէրեանի հրաւէրով եւ իր մասնակցութիւնը բերած առաջնորդանիստ Սուրբ Ղեւոնդ Մայր տաճարի օծման արարողութեանց:
Ի պատիւ Արմաշ Եպիսկոպոսի եղած սոյն ընդունելութեան ներկայ էին Ս.Դ.Հ.Կ.ի Կեդրոնական Վարչութեան ատենապետ Սեդրակ Աճէմեան, նոյն վարչութեան անդամներ` Տօքթ. Համբիկ Սարաֆեան, Վազգէն Գալթագճեան, ինչպէս նաեւ շրջանիս Ս.Դ.Հ.Կ. Վարիչ Մարմնի, Հ.Մ.Մ.ի, Նոր Սերունդ Մշակութային Միութեան եւ այլ կառոյցներու պատասխանատու ղեկավարներ, խմբագիրներ եւ խումբ մը նախկին դամասկահայեր:
Հ.Կ.Բ.Մ.ի անունով Արմաշ Սրբազանի ներկայութիւնը ողջունեց «Մասիս» շաբաթաթերթի խմբագրական կազմէն Գաբրիէլ Մոլոյեան : Ան Դամասկահայ գաղութն ու տեղւոյն Ս. Սարգիս եկեղեցին, իր յարակից կազմակերպութիւններով, նմանցուց փոքր միջնաբերդի մը, ուրկէ ներս կը թեւածէ հայատրոփ աշխոյժ կեանք մը:
Իր հերթին խօսք առաւ երիտասարդ առաջնորդ Գերշ. Արմաշ Սրբազան: Ան խանդավառ լուրեր հաղորդեց Դամասկոսի հայ գաղութի ազգային եւ եկեղեցական կեանքի մասին: Իմացանք որ գաղութն ունի շուրջ 6700 բնակիչ: Հոն կը գործեն հայ երեք յարանուանութեանց պատկանող եկեղեցիներ, վեց դպրոցներ եւ մարզական, մշակութային, հայրենակցական ու հասարակական այլ կազմակերպութիւններ: Առաջնորդարանը սերտ յարաբերութիւններու մէջ է այլ յարանուանութիւններու եւ պետական կառոյցներու հետ : Մեծ ընդունելութիւն եւ խանդավառութիւն ստեղծած է Ամենայն Հայոց Կաթողիկոսի Ն.Ս.Օ.Տ.Տ. Գարեգին Բ. Հայրապետի Դամասկոս տուած պաշտօնական այցելութիւնը, զոր կատարած էր ընդառաջելով Սուրիոյ Հանրապետութեան նախագահ Պաշշար Էլ Ասատի հրաւէրին: Վեհափառ Հայրապետի այցելութիւնը մեծ ոգեւրութիւն ստեղծած էր նաեւ դամասկահայ գաղութէն ներս: Այս առթիւ իմացանք որ Դամասկոսի ազգային Թարգմանչաց վարժարանը որոշուած է վերածել երկրորդական վարժարանի: Այսպիսով նոր ոստում մը արձանագրուած կ`ըլլայ կրթական բնագաւառին մէջ: Այնուհետեւ Արմաշ Սրբազան օրհնեց օրուան ընթրիքը:
Ընդունելութեան ընթացքին հիւր եկեղեցականը մէկ առ մէկ այցելեց բոլոր սեղաները եւ մօտէն ծանօթացաւ ներկաներուն, միաժամանակ սիրով պատասխանեց իրեն ուղղուած հարցումներուն:
Երեկոյի աւարտին ելոյթ ունենալով Արեւմտեան Ամերիկայի Վարիչ Մարմնի ատենապետ Վազգէն Խոտանեան, Հ.Կ.Բ.Մ.ի անունով շնորհակալութիւն յայտնեց Գերշ. Տ. Արմաշ Եպս. Նալպանտեանին, մաղթելով քաջառողջութիւն եւ նորանոր յաջողութիւններ իր եկեղեցանուէր ու ազգանուէր գործունէութեանց: Միաժամանակ` բարի վերադարձ իր հօտին:
Ներկաները լաւագոյն տպաւորութիւններով բաժնուեցան սրահէն, բարի ճանապարհ մաղթելով Արմաշ սրբազանին:

Leave a Reply

Your email address will not be published. Required fields are marked *

Sign Up for Our Newsletters

Get notified of the latest updates from MassisPost.

You May Also Like

Official Schedule of Centennial Commemorative Events in Los Angeles

We hereby announce the schedule of commemorative events organized by the Armenian…

An Interview with California State Assembly Member and Candidate for US Congress Katcho Achadjian

By Ani Marselian To better acquaint Massis Weekly readers with 24th Congressional…

AGBU Asbeds’ Evening with a Scholar/Ambassador Sheds Light on the Current Realities and Future of Artsakh

LOS ANGELES — In its fifteen-year young history, the AGBU Asbeds has…

Armenian Genocide Commemorated at the California State Capitol

SACRAMENTO, CA – The Armenian Council of America, in partnership with the…