Հայաստանի մէջ ԱՄՆ դեսպան Ռիշարտ Միլսի կարծիքով ցուցարարներն ու հայ ժողովուրդը գովեստի խօսքի արժանի են խաղաղ, կանոնաւոր կերպով Նիկոլ Փաշինեանի առաջնորդութեամբ փողոց դուրս գալու համար։
«Պէտք է գովեստով արտայայտուիմ նաեւ անվտանգութեան պաշտօնեաներու, կառավարութեան մասին, որոնք վերջին 11 օրերու ընթացքին մեծ զսպուածութիւն ցուցաբերեցին», – ըսած է դեսպանը:
Դեսպան Միլսը աւելացուցած է, որ այնուամենայնիւ եղած են արժանահաւատ հաղորդումներ ցուցարարներու, լրագրողներու դէմ բռնութիւններու մասին, եւ այդ դէպքերով պէտք է իրականացուի համապարփակ քննութիւն, իսկ մեղաւորները պէտք է պատժուին սահմանուած կարգով:
Հայաստանի մէջ ԱՄՆ դեսպան Միլսը ճեպազրոյցի ընթացքին անդրադարձած է նաեւ Հայաստանի արդէն նախկին վարչապետ Սերժ Սարգսեանի հրաժարականին, նշելով, որ ան իրական առաջնորդի նման գործեց՝ լսելով Հայաստանի ժողովուրդի ձայնը եւ կայացնելով այդ բարդ որոշումը:
«Առաջիկայ օրերուն մենք կ’աշխատինք վարչապետի պաշտօնակատար պարոն Կարապետեանի հետ։ Բոլոր հայերու նպատակը հիմա պէտք է ըլլայ համախմբուած շարունակել երկխօսութիւնը, գալ ընդհանուր յայտարարի առաջիկայ քայլերու շուրջ։ Սա հիանալի պահ է հայ ժողովուրդի եւ այս երկրի ժողովրդավարութեան ոգիի համար», – իր խօսքը ամփոփած է դեսպանը։
Հայաստանի մէջ Եւրամիութեան պատուիրակութեան ղեկավար, դեսպան Պյոտր Սվիտալսկին ընդգծած է, որ ԵՄ-ն այժմ եւս կարեւորած է այս գործընթացին մէջ ներգրաւուած բոլոր կողմերու միջեւ երկխօսութիւնը՝ քաղաքական ճգնաժամը յաղթահարելու համար․ – «Եւրոպական միութիւնը կ’ըլլայ Հայաստանի եւ հայ ժողովուրդի կողքին այս ողջ գործընթացի ընթացքին»:
Անդրադառնալով ԵՄ-Հայաստան պայմանագիրին, նշած է, որ Հայաստանն ու Եւրամիութիւնը այժմ ծրագիր ունին եւ պէտք է աշխատին անոր իրականացման համար․ – «Վերջին իրադարձութիւնները ցոյց տուին, որ Հայաստանի ժողովուրդը շատ կը կարեւորէ այն բոլոր արժէքները, որոնք մեր համաձայնագիրի հիմքը կը կազմեն, այժմ աւելի ջանասիրաբար պէտք է աշխատինք անոր կէտերու իրականացման շուրջ»։
