Փետրուարի 11-ին եւ 12-ին Անկարայում տեղի է ունեցել Թուրքիոյ ընդդիմադիր Ժողովուրդների Դեմոկրատական կուսակցութեան (ԺԴԿ ) 3-րդ համագումարը, որին մասնակցելու հրաւէր է ստացել նաև Սոցիալ Դեմոկրատ Հնչակեան կուսակցութեան Կենտրոնական վարչութիւնը: Ներկայացնում ենք Ձեզ ԺԴԿ-ի համագումարին ՍԴՀԿ ԿՎ-ի ուղարկած ուղերձի հայերէն եւ թուրքերէն տարբերակը:
Յարգելի համագումարի դիւան, յարգելի Սէփիլ Քեմալ բէյ եւ Սելահէդդին Տեմիրթաշ.
Գոհունակութեամբ ստացանք «Ժողովուրդների Դեմոկրատական Կուսակցութեան » 3-րդ հերթական համագումարի հրաւէրը:
Հարգելի ընկերներ եւ բարեկամներ.
ՍԴՀԿ Կենտրոնական Վարչութեան եւ աշխարհասփիւռ Հնչակեան շարքի անունով ողջունում ենք «Ժողովուրդների Դեմոկրատական Կուսակցութեան » 3-րդ համագումարը և մաղթում բեղուն ու արդիւնաուետ աշխատանք:
Արդարեւ, թէ՛ Միջին Արեւելքը եւ թէ՛ տարածաշրջանն ընդհանրապէս, շատ վտանգաւոր եւ ճակատագրական հանգրուանում են: Գերտէրութիւնների, շրջանային պետութիւնների ու ծայրայեղական խմբաւորումների քաղաքական, տնտեսական ու հատուածական շահերի բախման հետեւանքով տարածաշրջանը մխրճուած է վերջ չունեցող հակամարտութիւնների ու տագնապների շրջանակի մէջ:
Այսպիսի անօրինաչափ իրավիճակում է տեղի ունենում մեր բարեկամ ԺԴԿ-ի 3-րդ հերթական համագումարը: Մենք համոզուած ենք, որ համագումարի հաջողութիւնը մեծապէս կկարողանայ նպաստել տարածաշրջանում խաղաղութեան եւ ազգերի միջև համերաշխութեան հաստատման գործին: Հետևաբար, եւս մէկ անգամ ողջունում եւ մեր զօրակցութիւնն ենք յայտնում ձեզ, ինչպէս նաեւ վերահաստատում մեր կուսակցութիւնների միջեւ բարեկամութեան եւ համագործակցութեան շարունակականութիւնը:
Ընկերական ողջոյններով,
ՍԴՀԿ Կենտրոնական Վարչութիւն