Սոցիալ Դեմոկրատ Հնչակեան կուսակցութեան Հայաստանի կազմակերպութեան 11-րդ համագումարի աշխատանքներն աւարտուեցին Յունուարի 28-ին:
11-րդ համագումարը Հայաստանում տեղի ունեցող ներքաղաքական զարգացումների վերաբերեալ տուեց իր գնահատականները.
Հայաստանի Հանրապետութեան բնակչութեան սոցիալապէս անապահով հատուածն ունի կուսակցութեան գործնական աջակցութեան կարիքը, որը դրսեւորուելու է քաղաքական բոլոր հնարաւոր հարթակներում եւ շարունակելու է մնալ Կուսակցութեան գործունէութեան առանցքային թիրախը:
Հասարակութեան կարեւորագոյն ու առաւելապէս խոցելի հատուածը աշխատաւոր մարդն է: Համագումարը գտաւ, որ ՍԴՀԿ պէտք է շարունակի իր ուշադրութեան կեդրոնում պահել ու գործնական քայլեր կիրառել՝ աշխատաւոր մարդու իրաւունքները պաշտպանելու եւ եղած աղաղակող խախտումներին հանրային հնչեղութիւն ապահովելու համար:
Օրէնքի լիակատար հաւասարութիւնը երկրում անվտանգութեան գլխաւոր երաշխիքն է: Ուստի համագումարը կարեւոր է համարում համահայկական ջանքերի գործադրումը երկրում առկայ արատաւոր երեւոյթների արմատախիլ անելու հարցում:
Արտագաղթը Հնչակեան կուսակցութիւնը համարում է երկրի առջեւ ծառացած կարեւորագոյն մարտահրաւէր: Այն վերածուել է ազգային աղէտի, որը կասեցնելու համար անհրաժեշտ է գործնական քայլեր, աշխատատեղերի ապահովում եւ քաղաքացիների՝ ՀՀ-ում ապրելու արժանապատիւ պայմաններ:
Համագումարը գտաւ, որ Արցախի հիմնախնդիրը հայ ժողովրդի եւ կուսակցութեան համար մնում է առանցքային, սկզբունքային խնդիր: Կուսակցութիւնը կանգնած է Արցախի ժողովրդի ազատ կամքի արտայայտման կողքին եւ անվերապահ սատարում է Հայաստանի եւ Արցախի Զինուած ուժերին: Խաղաղ ժամանակ հնչակեանը քաղաքացի է, պատերազմական դրութեան ժամանակ հայոց բանակի զինուոր:
Համագումարը գտնում է, որ երիտասարդութիւնը երկրի շարժիչ ուժն է, ուստի անհրաժեշտ է յստակ երիտասարդութեանը նուիրուած քաղաքական գծի ամրապնդում, ծրագրերի իրականացում:
Երկրի ընդերքը համաժողովրդական հարստութիւնն է, ուստի համագումարը ապագայ վարչութեանը յանձնարարում է ձեւաւորել ու կազմակերպել ընդերքի ճիշդ շահագործման հայեցակարգ:
Յառաջիկայ ներքին քաղաքական զարգացումների մասին ՍԴՀԿ Հայաստանի նորընտիր վարչութիւնը իր ժամանակին հանդէս կգայ յաւելեալ յայտարարութեամբ:
Յունուարի 28-ին Սոցիալ Դեմոկրատ Հնչակեան կուսակցութեան Հայաստանի նորընտիր վարչութիւնը՝ բաղկացած 9 ընկերներից, գումարեց իր անդրանիկ նիստը եւ կատարեց հետեւեալ դիւանային բաժանումները:
Սեդրակ Աճէմեան – ատենապետ
Արմէն Մկրտչեան – քաղաքական խորհրդի ղեկավար
Վազգէն Մեսրոպեան – փոխատենապետ
Արտաւազդ Սարգսեան – ատենադպիր
Յարութիւն Պալապանեան – գանձապահ
Դաւիթ Խոսրովեան – ներքին դիւանի պատասխանատու
Գագիկ Մելիքեան – խորհրդական
Արսէն Կուպէլեան – խորհրդական
Յովհաննէս Տէրտէրեան – խորհրդական
Բացի դիւանային բաժանումներից, ՍԴՀԿ Հայաստանի վարչութեան որոշմամբ Աշոտ Գրիգորեանը նշանակուել է ՍԴՀԿ Մեծն Մուրատ երիտասարդական ուսանողական միութեան ատենապետ, իսկ Գեղամ Յարութիւնեանը՝ արտաքին յարաբերութիւնների դիւանի պատասխանատու:
ՍԴՀԿ Հայաստանի կազմակերպութեան մամլոյ դիւան
