Իսթանպուլի մէջ տեղի ունեցած «Իսլամական համագործակցութեան» արտահերթ համաժողովի ընթացքին, որ նուիրուած էր ԱՄՆ-ի կողմից Երուսաղէմը Իսրայէլի մայրաքաղաք ճանչնալու հարցին ու անոր հետեւանքով Մերձաւոր Արեւելքի մէջ ստեղծուած իրավիճակին, ելոյթ ունեցած է նաեւ հաւաքին ներկայ եղող Ատրպէյճանի նախագահ Իլհամ Ալիեւ:
Ան իր ելոյթի մեծ մասը, սակայն, յատկացուցած է ղարաբաղեան հարցին` մահմետական երկիրներու առաջնորդներուն յիշեցնելով, որ «Հայաստան գրաւած է Լեռնային Ղարաբաղն ու շրջակայ հինգ շրջանները», եւ որ «Հայաստան չի գործադրեր ՄԱԿ-ի Ապահովութեան Խորհրդի բանաձեւերը»:
Ալիեւ հերթական անգամ յայտարարած է, թէ Ատրպէյճան երբեք չի կրնար համակերպիլ «հայկական գրաւման» հետ: «Հայաստանը չի կրնար ըլլալ մահմետականներու բարեկամը»,- Իսթանպուլի մէջ յայտարարած է Ալիեւ: