Ուաշինկթընի վերջնական նպատակը Թուրքիոյ նկատմամբ պատժամիջոցներու կիրառումն է։ Այդ մասին երէկ թրքական Kanal 24 հեռուստաընկերութեան եթերի ժամանակ յայտարարած է Թուրքիոյ փոխվարչապետ Պեքիր Պոզտաղ:
Թուրք պաշտօնեայի խօսքով, Ուաշինկթըն այդ նպատակով կը փորձէ օգտագործել Միացեալ Նահանգներու մէջ նախնական կալանքի տակ գտնուող գործարար Ռեզա Զարապի գործը:
«Ամերիկացիները կ’ուզեն Զարապէն ցուցմունքներ կորզել Թուրքիոյ ղեկավարութեան դէմ: Անոնք կրնան ըսել Զարապին` «կամ դուն բանտը կը փտիս մինչեւ կեանքիդ վերջը, կամ ալ կը ստորագրես այն ամէնի տակ, ինչ մենք քեզ կը թելադրենք», – նշած է Պոզտաղ:
Ռեզա Զարապ կը մեղադրուի թրքական կառավարութեան եւ պիզնեսի շարք մը ներկայացուցիչներու օգնութեամբ Իրանի հետ անօրինական առեւտուր ծաւալելու մէջ:
Զարապի իրականացուցած գործարքներու միջոցաւ պաշտօնական Թեհրանը կը կարենար շրջանցել միջազգային հանրութեան կողմէ սահմանուած պատժամիջոցները:
