Պաքու-Թիֆլիս-Կարս երկաթգիծի բացման արարողութեան մասնակցելու նպատակով Ատրպէյճան մեկնած Թուրքիոյ նախագահ Ռեճէփ Թայիփ Էրտողան հերթական անգամ յայտարարութիւն ըրած է Լեռնային Ղարաբաղի հակամարտութեան վերաբերեալ: Սպառելով իր քաղաքական բառապաշարը՝ այս անգամ Էրտողանը անցած է անէծքներու ժանրին:
Ինչպէս կը հաղորդէ «Արմենբրէս»ը, ատրպէյճանական լրատուամիջոցներուն տուած հարցազրոյցին Էրտողան, մասնաւորապէս, յայտարարած է. «Մենք կ’անիծենք Հայաստանի օկուպացիոն (տիրացման) քաղաքականութիւնը»: Ան նշած է, թէ ԼՂ հիմնահարցը «արիւնահոսող վէրք է ոչ միայն Ազրպէյճանի, այլեւ՝ Թուրքիոյ համար»:
