Հայաստան մեծապէս կը կարեւորէ հարեւան Իրանի հետ ունեցած ջերմ եւ բարեկամական յարաբերութիւնները, որոնք ունին դարաւոր պատմական լուրջ հիմքեր: Այս մասին, այսօր, 10 Հոկտեմբերին, Իրանի Իսլամական Հանրապետութեան նախագահի նստավայրին մէջ Իրանի նախագահ Հասան Ռոհանիի հետ հանդիպման ժամանակ նշած է ՀՀ վարչապետ Կարէն Կարապետեան:
Կարէն Կարապետեան շնորհակալութիւն յայտնած է հիւրընկալութեան համար եւ փոխանցած ՀՀ նախագահ Սերժ Սարգսեանի ողջոյններն ու բարեմաղթանքները: «Հայաստանը մեծապէս կարեւորում է հարեւան Իրանի հետ ունեցած ջերմ եւ բարեկամական յարաբերութիւնները, որոնք ունեն դարաւոր պատմական լուրջ հիմքեր եւ հիմնուած են փոխադարձ շահերի վրայ: Կարող եմ ուրախութեամբ նշել, որ այդ յարաբերութիւնները գտնուում են բարձր մակարդակի վրայ, եւ երկկողմ համագործակցութիւնը շարունակում է զարգանալ փոխըմբռնման մթնոլորտում»,- ըսած է ՀՀ վարչապետը:
Հասան Ռոհանի, ողջունելով Հայաստանի վարչապետ Կարէն Կարապետեանի այցն Իրան, համոզմունք յայտնած, որ այն պիտի նպաստէ հայ-իրանական բարեկամական յարաբերութիւններու յետագայ խորացման, տարբեր բնագաւառներու մէջ: ԻԻՀ նախագահն ընդգծած է, որ պատրաստակամ է օժանդակելու երկու երկիրներու կառավարութիւններու նախաձեռնութիւններուն, ինչպէս նաեւ համատեղ ծրագիրներու իրականացման:
Զրուցակիցները կարեւորած են շարք մը ոլորտներու մէջ, մասնաւորապէս, ուժանիւթի բնագաւառի, գիւղատնտեսութեան, տեղեկատուական տեխնոլոկիաներու, զբօսաշրջութեան, «Սիւնիք» եւ «Արաս» ազատ տնտեսական գօտիներու համագործակցութեան խորացումն ու ընդլայնումը, երկու երկիրներու միջեւ առեւտրաշրջանառութեան ծաւալներու աճը:
ՀՀ կառավարութեան ղեկավարն ընդգծած է հայ-իրանական քաղաքական երկխօսութեան բարձր մակարդակը: Կողմերն անդրադարձած են Լեռնային Ղարաբաղի հակամարտութեան կարգաւորման ու տարածաշրջանային խնդիրներուն առնչուող հարցերու: Կարէն Կարապետեան նշած է, որ Հայաստան բարձր կը գնահատէ Իրանի հաւասարակշռուած վերաբերմունքը Լեռնային Ղարաբաղի հիմնահարցին մէջ, բան մը, որ տարածաշրջանային խաղաղութեան եւ անվտանգութեան ապահովման կարեւոր երաշխիքներէն է:
Իրանի նախագահը ՀՀ նախագահին ու հայ ժողովրդին է փոխանցած իր ջերմ բարեմաղթանքներն ու բարձր գնահատած հայ համայնքի դերը երկրի տարբեր ոլորտներու զարգացման գործին մէջ:
