Հայաստանը մեծապէս կ’արժեւորէ Վրաստանի դերակատարութիւնը Հարաւային Կովկասի տարածաշրջանային անվտանգութեան հարցերուն մէջ եւ կ’ակնկալէ Լեռնային Ղարաբաղի հիմնախնդիրի կարգաւորման գործընթացին մէջ Վրաստանի հաւասարակշռուած դիրքորոշումը: Այս մասին յայտարարած է Ազգային ժողովի նախագահ Արա Բաբլոյեան, Թիֆլիս կատարած պաշտօնական այցի ծիրին մէջ երէկ հանդիպելով Վրաստանի նախագահ Կիորկի Մարկուելաշուիլիին հետ:
«Մեր պատկերացմամբ՝ Լեռնային Ղարաբաղի հակամարտութեան խաղաղ կարգաւորումն այլընտրանք չունի: Լեռնային Ղարաբաղի հիմնախնդիրը, լինելով մարդու իրաւունքների խնդիր, կարող է լուծուել միայն Արցախի ժողովրդի ազատ ինքնորոշման միջոցով», – Ազգային ժողովի հանրային կապերու վարչութեան փոխանցմամբ, ըսած է Բաբլոյեան:
Հայաստանի խորհրդարանի խօսնակն ընդգծած է, որ Ատրպէյճանի կողմէ սանձազերծուած սպառազինութիւններու մրցավազքը լուրջ վտանգ է տարածաշրջանի բոլոր երկիրներուն համար:
«Մեր եղբայրական սիրտը կը ցաւի ատրպէյճանա-հայկական հակամարտութեան համար: Մէկ բան հաստատ է, որ մեզի՝ փոքր ազգերուս համար այդպիսի հակամարտութիւնները կրնան կործանարար ըլլալ: Մենք կ’աղօթենք տարածաշրջանի խաղաղութեան համար», – յայտարարած է Վրաստանի նախագահը:
Մակուելաշուիլի շնորհակալութիւն յայտնած է Հայաստանին Վրաստանի մէջ տեղի ունեցած հրդեհներու ժամանակ աջակցելուն համար, ափսոսանք յայտնած, որ այդպիսի աղէտներ տեղի ունեցած են նաեւ Հայաստանի մէջ:
Խօսելով վրացա-հայկական դիւանագիտական յարաբերութիւններուն մասին, Վրաստանի նախագահը մասնաւորապէս նշած է, որ արդէն 25 տարի երկու երկիրներու յարաբերութիւններուն մէջ յառաջընթացն ակնյայտ է, եւ Վրաստան մշտապէս պատրաստ է Հայաստանի հետ քննարկելու որեւէ հարց եւ առաւել զարգացնելու երկու երկիրներու յարաբերութիւնները բոլոր ոլորտներու մէջ:
Նոյն օրը Հայաստանի խորհրդարանական պատուիրակութիւնը հանդիպած է Համայն Վրաստանի Կաթողիկոս-պատրիարք Իլիա Բ-ի հետ:
Յիշեցնենք, Արա Բաբլոյեանի գլխաւորած պատուիրակութիւնը երկօրեայ այցով Թիֆլիս ժամանած է երէկ եւ նախ հանդիպած է Վրաստանի խորհրդարանի նախագահ Իրաքլի Քոպախիձէի հետ: Ծրագրուած են նաեւ հանդիպումներ Վրաստանի վարչապետ Կիորկի Քուիրիքաշուիլիի, Արտաքին գործոց նախարար Միխէիլ Ճանելիձէի հետ: