Home ԳԼԽԱՒՈՐ ԼՈՒՐԵՐ Նախիջեւան Ատրպէյճանի Համար Հաւանական Գործողութիւններու Նոր Թատերաբեմ է. Ռիչըրտ Կիրակոսեան

Նախիջեւան Ատրպէյճանի Համար Հաւանական Գործողութիւններու Նոր Թատերաբեմ է. Ռիչըրտ Կիրակոսեան

by MassisPost

Տարածաշրջանային հետազօտութիւններու կեդրոնի ղեկավար Ռիչըրտ Կիրակոսեանի կարծիքով, Լեռնային Ղարաբաղի մէջ ռազմական գործողութիւնները պիտի վերսկսին։

Ըստ վերլուծաբանին, Ատրպէյճանի համար գրաւիչ է յարձակման նոր փորձը։

«Ես մնում եմ այն կարծիքին, որ ռազմական գործողութիւնները վերսկսուելու են, յատկապէս եթէ դիտարկենք, թէ կողմերը որքանով են շահագրգիռ դրանում: Նախ` Ատրպէյճանը: 2016-ը Ատրպէյճանի համար նշանակալի ձեռքբերում էր: Առաջին անգամ է, որ այդ երկիրը ինչ-որ տարածք է գրաւել, անկախ այն բանից, թէ դա որքան չնչին տարածք է: Միւս կողմից` այս անգամ նրանք այլեւս յանկարծակի չեն բերի, իսկ Հայաստանի եւ Լեռնային Ղարաբաղի ուժերը շատ աւելի լաւ են պատրաստուած եւ աւելի լաւ են պաշտպանուած: Այլ կերպ ասած, եթէ նոր մարտեր սկսուեն` Ատրպէյճանը նորից յարձակում նախաձեռնի, զոհերի թիւը աւելի մեծ կը լինի, քանի որ Ատրպէյճանը այս անգամ փորձելու է աւելի ծանր տեխնիկա օգտագործել եւ թիրախաւորել քաղաքացիական բնակչութեան կենտրոնները: Այնպէս որ սա աւելի ծանր կը լինի, քան 2016-ի Ապրիլին: Բացի այդ, Ատրպէյճանի տեսակէտից` ոչինչ չի խանգարում նոր յարձակմանը, ոչ ոք ճնշում չի գործադրում: Այնպէս որ Ատրպէյճանի համար շատ գրաւիչ է յարձակման նոր փորձը», – «Կիրակնօրեայ վերլուծական Հրայր Թամրազեանի հետ» հաղորդման ժամանակ յայտնած է Կիրակոսեան։

Ըստ վերլուծաբանին, նոր ռազմական գործողութիւնները կրնան նաեւ ոչ կանխամտածուած լայնածաւալ պատերազմի պատճառ դառնալ: «Դա կարող է յանգեցնել մի իրավիճակի, երբ ռեկիոնալ ուժերը` Ռուսաստանը, Թուրքիան եւ Իրանը հարկադրուած կը լինեն գործել կամ պատասխան քայլեր ձեռնարկել: Այստեղ յատկապէս հետաքրքիր է Իրանի վիճակը եւ, քանի որ այդ երկիրը դեռ պատրաստ չէ հանդէս գալ որպէս լիարժէք ռեկիոնալ ուժ, սակայն արդէն նկատելի է, որ տարածաշրջանի դէմքը փոխուում է, այստեղ այլեւս միայն Ռուսաստանն ու Թուրքիան չեն, այլ ուժերի եռեակ է ձեւաւորուում՝ Իրանի մասնակցութեամբ: Բարեբախտաբար Հայաստանը եւ Լեռնային Ղարաբաղը դասեր քաղել են: Մասնաւորապէս, կոռուպցիան ընկալուում է որպէս խոշորագոյն սպառնալիք անվտանգութեան առումով: Սթաթուս քըւօն այլեւս հնարաւոր չէ պահպանել, այն այլեւս ընդունելի չէ: Միեւնոյն ժամանակ, հայկական կողմի հիմնական թուլութիւնը, որը յաճախ անտեսուում է, տնտեսական թուլութիւնն է, ոչ թէ՝ ռազմականը: Ընդ որում, մի շարք գործօններ կան. թուլացող Ատրպէյճանն էլ աւելի անկանխատեսելի եւ անկայուն է դառնում: Դրանով իսկ այն դառնում է այլ տիպի ռազմական հակառակորդ, քան այն, ինչ մենք տեսել ենք, եւ դրան պէտք է պատրաստ լինել», – ըսած է Կիրակոսեան:

Ատրպէյճան կը փորձէ նոր, անսպասելի յարձակումներ իրականացնելու հնարաւորութիւններ գտնել, յայտնած է վերլուծաբանը, նշելով, որ այս առումով Նախիջեւան հնարաւոր գործողութիւններու նոր թատերաբեմ է:

«Ռազմական իմաստով` շփման գծում շատ քիչ են փոփոխութիւնները եւ նոր զարգացումները: Տաւուշի շրջանում եւս Ատրպէյճանը մեծ հաշուով չափազանց յաճախ է օգտագործել յարձակումների հնարաւորութիւնները: Քանի որ այդ ուղղութիւններով անակնկալ յարձակումների հնարաւորութիւնները սպառուել են, այժմ Ատրպէյճանը փորձում է նոր, անսպասելի յարձակումներ իրականացնելու հնարաւորութիւններ գտնել: Եւ այս առումով Նախիջեւանը փոթենցիալ գործողութիւնների նոր թատերաբեմ է: Դա նոր ճակատ բացելու հնարաւորութիւն է, որը Ատրպէյճանի համար, ցաւօք սրտի, մեծ հնարաւորութիւններ է բացում: Նա փորձում է նախապատրաստել փոքր, սահմանափակ, ուշադրութիւն շեղող յարձակում Նախիջեւանից, որը ոչ մի միայն կը ստիպի Հայաստանին ուշադրութիւնը շեղել Ղարաբաղից, այլ կարող է նաեւ յանգեցնել Թուրքիայի հետ Հայաստանի առճակատման: Որովհետեւ Թուրքիան պարտաւորութիւն ունի ոչ թէ Ատրպէյճանի, այլ քոնքրէթ Նախիջեւանի նկատմամբ` որպէս անվտանգութեան երաշխաւոր: Եւ հետաքրքիր է, որ անցած վեցից ութ ամիսներին Թուրքիայի արտգործնախարարութիւնը չափազանց անհանգստացած է Նախիջեւանի ուղղութեամբ յարձակման դէպքում Թուրքիայի` հակահարուած հասցնելու պարտաւորութեան կապակցութեամբ», – մանրամասնած է վերլուծաբանը, սակայն նշելով, որ Նախիջեւան ռազմական յարձակում սկսելու տեսակէտէ յարմար դիրք չէ։

«Որովհետեւ Հայաստանի հարաւում մեր դիրքերը մեծապէս ուժեղացուել են անցած տարիների ընթացքում, բացի այդ`այդ տարածքի աշխարհագրութիւնը, ռելիէֆը շատ դժուար են դարձնում նրանց համար յարձակողական գործողութիւններ մղելը: Եւս մէկ դիտարկում` Նախիջեւանը յատկապէս կարեւոր է, քանի որ այս թեման ներառուած է եղել անգամ ԱՄՆ Պաշտպանութեան նախարար Ճէյմս Մաթիսի գլխաւորած պատուիրակութեան պրիֆինկում, որտեղ մտահոգութիւն էր յայտնուում, որ դա կարող է ստեղծել իրավիճակ, երբ ՆԱԹՕ-ի անդամ Թուրքիան, լինելով անվստահելի եւ անհաւասարակշիռ գործընկեր, կարող է չդիմանալ գայթակղութեանը կամ պարզապէս հարկադրուած լինի ներքաշուել հակամարտութեան մէջ», – ամփոփած է Կիրակոսեան։

Հարակից Նյութեր

Leave a Comment