Թուրքիոյ Տիարպէքիր նահանգի Հազզօ գիւղի 76-ամեայ բնակչուհին պատմած է, որ թուրք յատուկ ջոկատայինները, հայ ըլլալու մէջ կասկածելով, զինք ճնշումներու ենթարկած են: Այս մասին կը յայտնէ «Ակօս» պարբերականը:
Քրտական Հազզօ գիւղի բնակչուհի Սանիէ Էքթին իր թոռնուհիին պատմած է, որ իրենց տուն այցելած են քաղաքացիական հագուստով թուրք յատուկ ջոկատայիններ եւ հայերէն խօսած:
Անոնք քիւրտ կնոջ տան մէջ «Աստուածաշունչ» տեսնելով, հայերէն ըսած են. «Եթէ հայ ես, քօղարկելու կարիք չկայ, անկեղծ ըսէ մեզի»:
Տիարպէքիրի Հազզօ գիւղը գլխաւորաբար քիւրտերով բնակուած է, որոնք կ’աջակցին քիւրտերու անկախութեան համար պայքարող Քիւրտիստանի բանուորական կուսակցութեան, եւ այդ պատճառով գիւղը մշտապէս թուրք յատուկ ջոկատայիններու հսկողութեան տակ է:
«Ակօս»ի հետ զրուցած է Սանիէ Էքթինի թոռնուհի Ճէյլան Աքչա, որ պատմած է, թէ իր մեծ մայրը քիւրտ իսլամ է եւ երիտասարդ օրերուն մասնակցած է քրտական շարժումներուն:
Թուրք ոստիկաններուն մօտ կասկած առաջացուցած է տան գրադարանին մէջ «Աստուածաշունչ»ի առկայութիւնը: