Home ՀԱՅԱՍՏԱՆ «Քանի Դեռ Պաշտօնեաների Զաւակները Չեն Ծառայում, Ունենալու Ենք Զոհեր»

«Քանի Դեռ Պաշտօնեաների Զաւակները Չեն Ծառայում, Ունենալու Ենք Զոհեր»

by MassisPost

Իրաւապաշտպան Ժաննա Ալեքսանեան «Ազատութեան» հետ զրոյցի ժամանակ խօսելով բանակին մէջ ողբերգական պարբերականութեամբ տեղի ունեցող անձնասպանութիւններուն մասին, պնդած է, թէ իշխանութիւնը բացարձակապէս անտարբերութիւն կը ցուցաբերէ այդ հարցին շուրջ:

«Ճիշդ է այն խօսքը, որ քանի դեռ պաշտօնեաների զաւակները չեն ծառայում բանակում, մենք անընդհատ ունենալու ենք զոհեր, անվերջ: Որովհետեւ որեւէ մէկին չի հետաքրքրում․․․ այդ ընտանիքների վիճակը: Որովհետեւ որեւէ մէկը չի այցելում: Մեր կազմակերպութիւնը միշտ այցելել է, գնացել է: Դա իրականացնելու միջոցներ չունի արդէն կազմակերպութիւնը, բայց գոնէ գոնէ էդ մարդկանց մխիթարելու, ինչ-որ մի վերաբերմունք ցոյց տալու․․․», – ըսած է Ալեքսանեան:

Իրաւապաշտպանին խօսքով, երբ Վիգէն Սարգսեան նշանակուեցաւ Պաշտպանութեան նախարար, ան «անմնացորդ նուիրուեց 1000 դրամների միջոցառմանը»՝ հասնելով ցանկալի նպատակին․ – «Բայց մի անգամ էլ էս մահուան դէպքերով տենց զբաղուէք․․․ Մի անգամ էլ զբաղուէք, թէ ինչու են մարդիկ կախուում, ինչու են ինքնասպանութիւն գործում, չնայած դատարաններում չեն հաստատուում այդ ինքնասպանութեան դէպքերը, միշտ կոծկուում են․․․ Այ, պէտք է նախարարը գնա, որպէսզի թոյլ չտայ, որ կոծկի Քննչական կոմիտէն այդ գործերը»:

Խաղաղ պայմաններու մէջ բանակէն ներս մահացած զինծառայողներու ծնողները բազմաթիւ բողոքի ցոյցեր կազմակերպած են Նախագահի նստավայրին, Գլխաւոր դատախազութեան շէնքին քով: Հարցին, թէ կա՞յ արդեօք նորութիւն այդ քրէական գործերու ընթացքէն, Ալեքսանեան արձագանգած է․ – «Գլխաւոր դատախազը այս տարի ընդունում էր այդ ծնողներին, որոնք մշտապէս բողոքում են: Այդ ծնողները չեն յարմարուում նրա հետ, որ իրենց որդիներին սպանողներին չեն յայտնաբերել, չեն գտել: Նրանք չեն կարողանում դրա հետ հաշտուեն: Պայքարել ոչ բոլորը կարող են, այս մարդիկ պայքարում են տարիներ շարունակ: Գլխաւոր դատախազը ընդունեց, բայց ի՞նչ արդիւնք: Ոչ մի արդիւնք․ իրանք ասում են՝ տարիները անցել են: Տարիները անցել են՝ պատժէք քննութիւնը իրականացնող մարդուն, ով որ կոծկել ա, ով որ փչացրել ա էդ քննութիւնը, ով որ չի կատարել իր պարտականութիւնները, չի բացայայտել: Եւ յայտնի են․ այդ նոյն ծնողները դիմել են նաեւ քննիչներին պատասխանատուութեան ենթարկելու․․․ դա էլ չեն անում: Իրենք չեն ուզում, որ որեւէ մէկը պատասխանատուութիւն կրի»:

Հարակից Նյութեր

Leave a Comment