Թուրքիոյ ընդդիմադիր Ժողովրդադեմոկրատական կուսակցութեան անդամ, խորհրդարանի հայազգի պատգամաւոր Կարօ Փայլան բողոքներ կայացուցած է Թուրքիոյ հանրապետական դատախազութիւն թրքական «ԵնիՇաֆաք» պարբերականի սիւնակագիր Հայրեթթին Քարամանի դէմ: Այս մասին կը գրէ «t24.com.tr» կայքը:
Օրեր առաջ Քարաման իր հերթական յօդուածներէն մէկը վերնագրած էր թրքական «Խոզի կաշին սփռոց չի դառնար, կեաւուրն ալ բարեկամ չի դառնար» ասացուածքով, վիրաւորանք ուղղելով քրիստոնեաներուն դէմ:
Իր յօդուածին մէջ «ԵէնիՇաֆաք»ի յօդուածագիրը մէջբերում կատարած էր Ղուրանին մէջ տեղ գտած հրահանգներէն, ոչ իսլամ ժողովուրդներուն հետ փոխ-յարաբերութիւններուն ու անոնց հետ վարուելու կանոններուն մասին:
Փայլան մեղադրած է թուրք սիւնակագիրը ժողովուրդին մէջ ատելութիւն սերմանելուն, ինչպէս նաեւ հասարակութեան որոշ զանգուածը նուաստացնող յօդուածներուն համար: