Այս շաբաթ լրացաւ «Սասնայ Ծռերու» գործողութեան առաջին տարելիցը, երբ խումբ մը զինեալներ, որոնց մէջ նախկին ազատամարտիկներ, յարձակում գործելով, երկու շաբաթ շարունակ գրաւման տակ պահեցին Հայաստանի ոստիկանութեան կեդրոնը: Այդ օրերուն Երեւանի մէջ տեղի ունեցան ծանր բախումներ` զինեալներուն զօրակցութիւն յայտնելու համար փողոց դուրս եկած հազարաւոր ցուցարարներու եւ իրաւապահներու միջեւ: Ստեղծուած պայթունավտանգ իրավիճակը հանգուցալուծում գտաւ երբ, որոշ խոստումներու դիմաց, զինեալները վար դնելով իրենց զէնքերը անձնատուր եղան: Այս գործողութեան ընթացքին զոհուեցան երեք ոստիկաններ ու ծանր վիրաւորուեցան «Սասնայ Ծռերու» շարք մը անդամներ:
Ինչպէս դէպքերու ընթացքին, այս օրերուն եւս քննարկման առարկայ են զէնքի միջոցաւ քաղաքական հարցեր լուծելու նպատակայարմարութիւնը: «Սասնայ Ծռերու» կողմնակիցները կը հաւատան որ, Հայաստանի մէջ սպառած ըլլալով իրավիճակ փոխելու բոլոր այլ տարբերակները, արդարացուած են բռնի միջոցներու օգտագործումը: Հակառակ տեսակէտի հեղինակները կը պնդեն որ, ժողովրդավարական երկիր կառուցելու ճանապարհին պէտք է բացառել բռնի միջոցներու օգտագործումը, որքան ալ դատապարտելի ըլլան իշխանութիւններու արարքները:
Այս օրերուն Երեւանի մէջ կ’ընթանան միաժամանակ չորս դատական գործեր: Տեղի կ’ունենան «Սասնայ Ծռերու», Ժիրայր Սէֆիլեանի, «Նորքի-Մարաշի» զինեալ խումբի դատական նիստերը, որոնց վրայ կ’աւելնայ Արցախի պաշտպանութեան նախկին նախարար Սամուէլ Բաբաեանին առաջադրուած մեղադրանքները: Բոլոր այս դատական հարցերը, թէեւ իրարմէ անջատ, առնչուած են զինեալ յեղաշրջում իրականացնելու փորձերու հետ:
Վերջին տարիներուն նման դէպքերու յաճախականութիւնը պէտք էր մղած ըլլար իշխանութիւններուն, որոշ դասեր քաղելու եւ վերահաշուարկ կատարելու: Այս գծով լաւագոյն առիթը կրնար հանդիսանալ Ապրիլին կայացած խորհրդարանական ընտրութիւնները: Սակայն, անգամ մը եւս Հայաստանի ժողովուրդը զրկուեցաւ իր իսկական ներկայացուցիչները ընտրելու տարրական իրաւունքէն:
Դժբախտաբար նման պայմանները կրնան ծնիլ նոր «Սասնայ Ծռեր» առաւել վտանգելով պատերազմի մէջ գտնուող մեր հայրենիքը:
«ՄԱՍԻՍ»