Ատրպէյճանին շուրջ 5 միլիառ տոլարի ռուսական սպառազինութիւն մատակարարելու պայմանագիրն արդէն իրականացուած է 90 տոկոսով: Այդ մասին ռուսաստանեան «Նովոսթի» լրատուական գործակալութեան յայտնած է Ատրպէյճանի Պաշտպանութեան նախարար Զաքիր Հասանով, ընդգծելով, թէ «նաեւ այդ զինամթերքի շնորհիւ է, որ Ատրպէյճան յաջողութեան հասած է անցեալ տարուայ ապրիլեան պատերազմին»:
Տարիներ առաջ կողմերը զէնք-զինամթերքի մատակարարման ոլորտին մէջ խոշորածաւալ պայմանագիր կնքած էին, որով Մոսկուա պարտաւորուած էր Ատրպէյճան ուղարկել Т-90 տիպի 100 թանկ, 100 BMP-3 զրահամեքենայ, «Սմերչ» համազարկային կրակի հակազդեցիք համակարգեր ու «Մսթա-Ս» կայանքներ: «Ժամանակակից այդ զէնքերը շատոնց Ատրպէյճան բերուած են եւ բարեյաջող կը կիրառուին», – նշած է Հասանով, Պաշտպանութեան նախարարի պաշտօնին 4 տարիներու ընթացքին առաջին անգամ ըլլալով հարցազրոյց տալով օտարերկրեայ լրատուամիջոցին՝ ռուսական գործակալութեան:
Ծաւալուն զրոյցի ընթացքին ազերի նախարարը պնդած է նաեւ, թէ Պաքու հակահրթիռային զէնք ունի, որ «կրնայ կործանել Հայաստանի մէջ տեղակայուած ռուսական «Իսկանդեր»ը»: «Ես՝ որպէս Պաշտպանութեան նախարար, կը յայտարարեմ, որ մենք ունինք հակազդեցութեան համակարգ, մենք կրնանք կործանել այդ հրթիռները: Մենք նոյնպէս ունինք հրթիռներ՝ 50 անգամ աւելի շատ: Ես ամբողջական պատասխանատուութիւն կը կրեմ իմ ըսած խօսքերուս համար», – յայտարարած է Ատրպէյճանի Պաշտպանական գերատեսչութեան ղեկավարը, աւելցնելով, որ այդ հրթիռներն Ատրպէյճան ձեռք բերած է ոչ Ռուսիոյ մէջ, որակով, սակայն, անոնք ռուսականէն վատ չեն:
Հասանով նշած է, որ Պաքու հետաքրքրուած է եւ կ’ուզէ Ռուսիայէն զէնքերու նոր խմբաքանակ ձեռք բերել, սակայն հրաժարած է մանրամասնել, թէ ինչպիսի եւ որքան: Անոր փոխարէն հաստատած է, որ շփման գիծին վրայ իրավիճակը երթալով կը լարուի, բանակցութիւններն արդիւնք չեն տար, բան մը, որ անընդունելի է Ատրպէյճանի համար:
«Վերջին տարիներուն ռազմական գործողութիւններու գօտիին վրայ իրավիճակը երթալով կը սրուի, պատճառը մէկն է՝ ատրպէյճանական հողերու գրաւումը, քանի դեռ երկու հակառակորդ բանակներ կանգնած են իրար դիմաց, թէժացումն անխուսափելի է», – յայտնած է Զաքիր Հասանով:
«Կը կարծէք, որ ղարաբաղեան խնդիրը պիտի լուծուի ռազմակա՞ն ճանապարհով», – ռուս լրագրողի հարցին ի պատասխան ըսած է Ատրպէյճանի Պաշտպանութեան նախարարը. – «Ես քաղաքական գործիչ չեմ, իմ երկիրս հաւատարիմ է խնդրի խաղաղ կարգաւորման, սակայն այդ չի նշանակեր, որ բանակցութիւնները պէտք է անվերջ ըլլան, իսկ անոնք արդէն շատ ձգձգուած են: Բանակցութիւնները յանուն բանակցութիւններու ոեւէ մէկուն պէտք չեն, բացի անկէ, նայեցէ’ք ձեր շուրջը՝ միջազգային օրէնքներն արդէն չեն աշխատիր, բոլորը իրենց յոյսը կը դնեն ուժի վրայ, եւ, բնականաբար, մենք պէտք է արձագանգենք անոր»: