Home ԳԼԽԱՒՈՐ ԼՈՒՐԵՐ ԱԺ Ընտրութիւններու Արդիւնքներու Ձեւաւորման Մէջ Հիմնական Դեր Խաղացած է Ընտրակաշառքը. Թրանսփարընսի Ինթըրնաշընլ

ԱԺ Ընտրութիւններու Արդիւնքներու Ձեւաւորման Մէջ Հիմնական Դեր Խաղացած է Ընտրակաշառքը. Թրանսփարընսի Ինթըրնաշընլ

by MassisPost

2017թ. խորհրդարանական ընտրութիւններուն մէջ վարչական ներուժի չարաշահման եւ այլ ընտրական խախտումներու ստուգողական համակարգի տուեալներով՝ ամէնէն շատ գրանցուած են ընտրակաշառքի դէպքեր: «Մետիա կեդրոն»էն ներս հրաւիրուած քննարկման Թրանսփարընսի Ինթըրնաշընլ հակակաշառակերական կեդրոնի (ԹԻՀԿ) ծրագիրներու ղեկավար Վարուժան Հոկտանեան մտահոգութիւն յայտնած է, որ Հայաստանի մէջ ընտրակեղծարարութիւնը ընդունած է համակարգային բնոյթ, եւ ինքը չի ալ ակնկալեր, որ իրենց արձանագրած փաստերը կը յանգեցնեն լուրջ արդիւնքներու: Նաեւ տեղեկացուցած է, որ միջազգային ստուգողական մեթոդէն ելլելով՝ իրենք չեն ներկայացուցած հաղորդումներ ընտրախախտումներու դէպքերով, այլ պարզապէս արձանագրած են անոնք:

Ան նշած է. «Ցաւօք, իրաւապահ մարմինների՝ տարիների աշխատանքը ցոյց է տալիս, որ դրանք կամ չեն հաստատւում, կամ եթէ հաստատւում էլ են, շատ աւելի սահմանափակ մաշտաբներով, իսկ արձանագրուած խախտումների՝ իրաւապահների կողմից բնութագրումը զանցանքներից այն կողմ չի գնում»:

Պարոն Հոկտանեանը տեղեկացուցած է, որ կիրառած են միջազգային մեթոդաբանութիւն, որպէսզի արդիւնքները համադրելի ըլլան այլ երկիրներու մէջ նմանատիպ ստուգողական ծրագիրներու հետ: Կիրառուած է լրատուամիջոցներէն քաղուած տեղեկութիւններու ուսումնասիրութիւնն ու տեղամասերու մէջ երիտասարդ ստուգողական համակարգերու իրականացուցած դիտարկումները: Անդրադառնալով արդիւնքներուն՝ պարոն Հոկտանեան ըսած է. «Խախտումներից ամենատարածուածն ընտրակաշառքի դէպքերն են՝ 90 դէպք, որից 53-ը տեղական դիտորդներ են յայտնաբերել, մնացածը ստացուել է ԶԼՄ-ներից: 59 դէպք ենք ունեցել, երբ շտապներում տեսել ենք, որ աշխատանքային ժամին են քարոզչութեամբ զբաղուած: 38 դէպք ենք արձանագրել, երբ պետական կամ համայնքային մարմինների կողմից ասֆալթապատման եւ այլ բարեկարգման դէպքեր են եղել: Անձնագրերի հաւաքագրման 14, ընտրողների ցուցակագրման 11 դէպք է գրանցուել»:

Պարոն Հոկտանեան ըսած է, որ իրենց տուեալներով՝ ընտրակաշառք հիմնական բաժնած է ՀՀԿ-ն, ընտրակաշառք բաժնած են նաեւ «Հայկական վերածնունդը», ԲՀԿ-ն եւ որոշ պարագաներու՝ Դաշնակցութիւնը:

Ըստ պարոն Հոկտանեանի՝ յետխորհրդային երկիրներէն միայն Հայաստանի եւ Ղրղըզստանի մէջ է, որ ճնշումները ոչ թէ ընդդիմադիր կուսակցութիւններու աքթիւիսթներու նկատմամբ են, այլ աւելի շատ քաղաքացիներուն, յատկապէս պետական համակարգի մէջ աշխատողներուն, եւ այս առումով ալ վարչական ներուժի չարաշահումը, ըստ Վարուժան Հոկտանեանի, իւրօրինակ կը դառնայ: Դառնալով վարչական ներուժի չարաշահման տեսակներուն՝ պարոն Հոկտանեան ըսած է, որ պետական պաշտօնեաներու աշխատաժամանակը լրջագոյն վարչական ներուժ է. «Որքան էլ ԿԸՀ-ն հակառակը պնդի, բայց, միեւնոյնն է, աշխատանքի ժամին քարոզչութիւն անելը հենց վարչական միջոցների չարաշահում է համարւում»: Վարուժան Հոկտանեանի հաւաստմամբ ՝ վարչական ներուժի չարաշահման համար կանխարգելիչ քայլ կրնայ ըլլալ կուսակցութիւններու հզօրացումը:

Հարակից Նյութեր

Leave a Comment