Ֆրանսայի Ազգային ժողովի ընտրութիւններու առաջին փուլին վստահ յաղթանակ կը տանի երկրի նախագահ Էմանուէլ Մաքրոնի գլխաւորած En Marche! շարժումը: Ինչպէս կը հաղորդէ «Արմէնբրես»-ը ընտրութիւններու արդիւնքները բաւական դրական եղած են նաեւ հայ եւ հայկական խնդիրներուն սատարող թեկնածուներուն համար, որոնք հիմնականօրէն առաջադրուած էին En Marche! («Առաջ, Հանրապետութիւն») շարժման եւ աւանդական աջերու՝ Հանրապետականներու կողմէն:
Մարսէյլի Պուշ տու Ռոն համայնքի առաջին ընտրատարածքին մէջ առաջատարը Փասքալ Շամասեանն է (En Marche!)` ձայներու 29.43 տոկոսով, իսկ երկրորդը Վալերի Պուայէն (Հանրապետական)` 24,68 տոկոսով: Ռոնի 13-րդ ընտրատարածքին մէջ առաջատարներն են Դանիէլ Կազարեանը (En Marche!)` 33,99 տոկոս եւ Ֆիլիփ Մէոնիէն (Հանրապետական)` 20,81 տոկոս: Օրէլուարի առաջին ընտրատարածքին մէջ առաջատարներն են Կիյոմ Գասպարեանը (En Marche!)` ձայներու 37.12 տոկոսով, իսկ երկրորդը Ֆրանք Մասսելուսը (Հանրապետական)` 22,15 տոկոսով: Օտը Սենի 7-րդ ընտրատարածքին մէջ աւելի շատ ձայներ ստացած են Ժաք Մարիլոսեանը En Marche!-էն` 48.48 տոկոս, եւ Էրիք Պերթոատի Հանրապետականներէն` 27.91 տոկոս:
Տարբեր ընտրատարածքներու մէջ առաջին դիրքեր կը գրաւեն հայկական խնդիրներուն մշտապէս աջակցող այնպիսի պատգամաւորներ, ինչպիսիք են Կի Թեսիքն, Միշել Լամպերը, Ֆրանսուա Փուփոնին, Ժանլիւք Քարուունասը, Ֆրանսուայ Ռոշպլուանը եւ ուրիշներ:
Ընտրութիւններու ընդհանուր արդիւնքներով՝ En Marche!-ը կը հաւաքէ ձայներու 28,21 տոկոսը: Երկրորդ տեղն է «Հանրապետականներու» աջ կեդրոնամէտ փլաթֆորմը՝ 15,77 տոկոս արդիւնքով: Մարին լը Փենի «Ազգային ճակատը» կը ստանայ ձայներու 13,2 տոկոսը: Մաքրոնի կուսակցութեան դաշնակիցը՝ «Դեմոկրատական շարժումը», կը հաւաքէ ձայներու 4,11 տոկոսը: Երկու կուսակցութիւնները միասին կրնան 390-430 տեղ ստանալ խորհրդարանի մէջ: Ֆրանսայի Ազգային ժողովը՝ խորհրդարանի ստորին պալատը, ունի ընդամէնը 577 տեղ: