ԵԱՀԿ Մինսքի խումբի համանախագահող երկիրները մօտ ժամանակներուն կը գտնեն 20 տարիէ աւել տեւող ղարաբաղեան խնդրի լուծումը: Այդ մասին 22 Mայիսին յայտարարած է Թուրքիոյ նախագահ Ռեճեփ Թայիփ Էրտողանը Պոլսոյ մէջ Սեւծովեան տնտեսական համագործակցութեան կազմակերպութեան (ՍԾՏՀ) հիմնադրման 25-ամեակին նուիրուած յոբելեանական գագաթաժողովին։
Նշենք, որ Հայաստանի ԱԳ նախարարի տեղակալ Աշոտ Յովակիմեանի ելոյթէն ետք նախագահողը` Թուրքիոյ նախագահ Ռեճեփ Թայիփ Էրտողանը, համաձայնելով, որ ՍԾՏՀ-ն ԼՂ-ի հիմնահարցի քննարկման հարթակ չէ, նշած է, որ այս խնդիրով կը զբաղուին ԵԱՀԿ Մինսքի խումբի համանախագահող պետութիւնները, որոնց ներկայացուցիչներէն մէկը` ՌԴ-ն, կը գտնուի դահլիճին մէջ: Էրտողանը յոյս յայտնած է, որ Մինսքի խումբի համանախագահող երկիրները մօտ ժամանակներուն կը գտնեն 20 տարիէ աւել տեւող այս խնդրի լուծումը:
Գագաթաժողովին իր ելոյթին մէջ ՀՀ ԱԳ նախարարի տեղակալ Աշոտ Յովակիմեանը, անդրադառնալով գագաթաժողովին Ատրպէյճանի ԱԺ նախագահ Օքթայ Ասատովի ելոյթին մէջ Հայաստանին հասցէագրուած մեղադրանքներուն, ըսած էր, որ Ատրպէյճանի ներկայացուցիչը կրկին փորձ կատարած է օգտագործել ՍԾՏՀ ամպիոնը` ներկայացնելու ԼՂ հակամարտութեան աղաւաղուած պատկերը: «Մենք համոզուած ենք, որ այս գագաթաժողովը այն տեղը չէ, իսկ ՍԾՏՀ-ն այն ձեւաչափը չէ, որտեղ պէտք է քննարկուի Լեռնային Ղարաբաղի հակամարտութիւնը: Անելով սա՝ ատրպէյճանական կողմը ցուցադրեց իր անյարգալից վերաբերմունքը ՍԾՏՀ Կանոնադրութեան, կազմակերպութեան սկզբունքների եւ նպատակների եւ այս գագաթաժողովի նկատմամբ»,- նշած է Յովակիմեանը:
Ատրպէյճանի շարունակական ռազմատենչ քաղաքականութեան, մասնաւորապէս, ապրիլեան յարձակումի եւ անոր հետեւանքներու վերացման ուղղութեամբ Հայաստանի եւ ԵԱՀԿ Մինսքի խումբի համանախագահներու կողմէ գործադրուող ջանքերու ընդհանուր ոլորտին մէջ ՀՀ ԱԳ նախարարի տեղակալը ներկայացուցած է այդ ջանքերու տապալման ուղղութեամբ Ատրպէյճանի կողմէ ձեռնարկուող քայլերը՝ ընդգծելով, որ. «Մեղադրանքները, ռազմատենչ կեցուածքը եւ միակողմանի առաւելապաշտական պահանջները չեն կարող լուծել հակամարտութիւնը: Լեռնային Ղարաբաղի հակամարտութեան կարգաւորման մէջ հնարաւոր է հասնել առաջընթացի, եթէ Ատրպէյճանը հրաժարուի ուժ գործադրելու քաղաքականութիւնից եւ բարեխղճօրէն ներգրաւուի բանակցութիւններում ԵԱՀԿ Մինսքի խմբի համանախագահների համաձայնեցուած ձեւաչափի շրջանակներում»: