Աշխարհի մէջ մամուլի ազատութեան խնդիրներով զբաղուող ամենահեղինակաւոր կառոյցներէն մէկը` «Լրագրողներ Առանց Սահմաններու» կազմակերպութիւնը, կրկին կոշտ քննադատութիւն հնչեցուցած է Ատրպէյճանի իշխանութիւններու հասցէին:
Կազմակերպութիւնը պաշտօնական Պաքուին քննադատող հերթական յայտարարութիւնը տարածած է Մայիս 3-ին, որ աշխարհի մէջ կը նշուի որպէս Մամուլի ազատութեան միջազգային օր:
«Լրագրողներ Առանց Սահմաններու» կազմակերպութեան յայտարարութեան հրապարակման առիթը ատրպէյճանական ամենաազդեցիկ ընդդիմադիր կայքերու արգելափակումն է, որ կը շարունակուի արդէն հինգ շաբաթէ ի վեր:
«Ազատութիւն» ռատիոկայանի ատրպէյճանական ծառայութեան, «Մէյտան TV», «Ազատլըղ» թերթի, ինչպէս նաեւ Azerbaijan Saati եւ «Թուրան TV» կայքերու արգելափակումը Ատրպէյճանի տարածքին մեկնարկած է 27 Մարտին:
Դիմելով այս քայլին` Ատրպէյճանի տեղափոխութեան, կապի եւ բարձր թեխնոլոկիաներու նախարարութիւնը մատնանշած է վերջերս հաստատուած օրէնսդրական լրացումները, որոնք հնարաւորութիւն կու տան պետական մարմիններուն դիմել կայքերու «կանխարգելիչ արգելափակման», եթէ անոնք «վտանգ կը ներկայացնեն պետութեան եւ հասարակութեան համար»:
Այժմ արդէն ատրպէյճանական իշխանութիւնները կը փորձեն դատական կարգով ամրագրել ընդդիմադիր կայքերու արգելափակումը երկրի տարածքին` դիմելով Պաքուի Սապաիլի շրջանային դատարան:
«Արգելափակելով առաջատար հինգ լրատուական կայքերը` Իլհամ Ալիեւի կառավարութիւնը կը վերացնէ Ատրպէյճանի մէջ լրատուամիջոցներու ազատութեան վերջին նշոյլները», – յայտարարած է «Լրագրողներ Առանց Սահմաններու» կազմակերպութեան Արեւելեան Եւրոպայի եւ Կեդրոնական Ասիոյ բաժնի ղեկավար Ճոն Պիրնը:
«Իշխանութեան քննադատներու հետապնդումները կը շարունակուին թէ՛ համացանցի մէջ, թէ՛ համացանցէն դուրս` հասնելով անգամ տարագրութեան մէջ գտնուող ընդդիմադիրներուն», – նշած են «Լրագրողներ առանց սահմաններու» կազմակերպութեան ներկայացուցիչները՝ ընդգծելով. – «Միջազգային հանրութիւնը պէտք է վերջ տայ ատրպէյճանական կառավարութեան անպատժելիութեան` պատասխանատուութեան ենթարկելով պաշտօնական Պաքուին Մարդու իրաւունքներու եւրոպական հռչակագրի եւ ՄԱԿ-ի քաղաքացիական եւ քաղաքական իրաւունքներու մասին համաձայնագրի դրոյթները շարունակաբար խախտելու համար»:
«Համացանցին մէջ գրաքննութիւն հաստատելով, ատրպէյճանական մամուլը կը յայտնուի Իլհամ Ալիեւի լիակատար վերահսկողութեան ներքոյ», – պնդած են «Լրագրողներ առանց սահմաններու» կազմակերպութեան ներկայացուցիչները` նշելով, որ ատրպէյճանից լրագրողներու դէմ ճնշումները շարունակուած են նաեւ այն պահուն, երբ կը գրուէր իրենց յայտարարութեան թեքսթը:
«Այս յայտարարութեան հրապարակումէն մէկ օր առաջ Պաքուի մէջ 30-օրեայ կալանքի դատապարտուած է «Քանալ13» առցանց հեռուստաընկերութեան ղեկավար Ազիզ Օրուճովը», – նշած են կազմակերպութեան ներկայացուցիչները:
