Ապրիլեան Քառօրեայ պատերազմի առաջին տարելիցի առթիւ հերոս նահատակներու յիշատակը կ’ոգեկոչեն հայ ազգային երեք կուսսակցութիւններու` Սոցիալ Դեմոկրատ Հնչակեան կուսակցութեան, Հայ Յեղափոխական Դաշնակցութեան եւ Ռամկավար Ազատական կուսակցութեան Արեւմտեան Ամերիկայի բոլոր շարքերը եւ յանուն անոնց, երեք կուսակցութեանց շրջանային ղեկավար մարմինները`
– Կը խոնարհին հայրնիքի հողի պաշտպանութեան նուիրական առաքելութեան ընթացքին Հայոց Բանակի զոհուած, վիրաւորուած եւ մարտական առաջադրանքները յառաջ տանող զինուորներու սխրանքին առջեւ
– Կը յայտարարեն իրենց ամբողջական զօրակցութիւնը Հայոց Բանակի հզօրացման ի խնդիր բոլոր նախաձեռնութիւններուն
– Հայաստանի իշխանութիւններէն կ’ակնկալեն մեր սահմաններու պաշտպանութեան գործին նուազագոյն վնասն իսկ պատճառող կաշառակերութեան կամ իւրացումներու երեւոյթներուն հանդէպ ցուցաբերէ օրէնքի խստագոյն վերաբերում
– Կը դատապարտեն Ատրպէյճանի իշխանութիւններու յարձակողապաշտ, մարդկային իրաւունքները կոպտօրէն խախտող վարքագիծը
– Կոչ կ’ընեն շրջանիս համայն հայութեան միանալու Արցախի եւ Հայաստանի անվտանգութեան, պետականութեան ամրապնդման ի խնդիր աշխատանքներուն եւ ծրագիրներուն, գործով արտայայտելով մեր յարգանքն ու երախտագիտութիւնը նահատակ եւ այսօր դիրքերու վրայ արթուն հսկող հերոսներուն հանդէպ:
ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ ԱՐԵՒՄՏԵԱՆ ԱՄԵՐԻԿԱՅԻ ՎԵՐԻՆ ՄԱՐՄԻՆ
ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ ԱՐԵՒՄՏԵԱՆ ԱՄԵՐԻԿԱՅԻ ԿԵԴՐՈՆԱԿԱՆ ԿՈՄԻՏԷ
ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ ԱՐԵՒՄՏԵԱՆ ԱՄԵՐԻԿԱՅԻ ՇՐՋԱՆԱՅԻՆ ՎԱՐՉՈՒԹԻՒՆ
