Ազգային անվտանգութեան ծառայութեան (ԱԱԾ) մեկուսարանը գտնուող Լեռնային Ղարաբաղի պաշտպանութեան նախկին նախարար Սամուէլ Պապայեանը կը պնդէ, որ «Իգլա»-ի հետ որեւէ կապ չունի: Այս մասին «Ազատութեան» հետ զրոյցին նշած է անոր պաշտպան Աւետիս Քալաշեանը՝ տեղեկացնելով, որ Պապայեանը արդէն ցուցմունք տուած է՝ ընդգծելով, որ չի ճանչնար նաեւ նոյն գործով ձերբակալուած միւս երկու անձանց։
«Օսկանեան-Ռաֆֆի-Օհանեան» (ՕՐՕ) դաշինքի աջակից Սամուէլ Պապայեանը երէկ ձերբակալուած է «Իգլա» տեսակի զենիթա-հրթիռային համալիր տեղափոխելու փաստի առթիւ յարուցուած քրէական գործի ծիրէն ներս: Ըստ ԱԱԾ-ի, ձեռք բերուած են արժանահաւատ տուեալներ, որ «նշուած համալիրի բաղկացուցիչ մասերու ձեռքբերումը եւ փոխադրումը իրականացուցած անձինք գործած են Սամուէլ Պապայեանի հետ ունեցած նախնական համաձայնութեամբ եւ անոր պատուէրով»։
Ի դէպ, տարածուած հաղորդագրութեան մէջ ԱԱԾ-ն տեղեկացուցած է, որ Վրաստանի իրաւապահ մարմիններուն հետ կ’իրականացուին համատեղ միջոցառումներ՝ յայտնաբերուած ռազմամթերքը հայ-վրացական պետական սահմանով ենթադրաբար անցնելու վերաբերեալ ձեռք բերուած նախնական տուեալներու հաւաստիութիւնը ստուգելու համար:
Հայաստանի պաշտպանութեան նախկին նախարար Վաղարշակ Յարութիւնեան, անդրադառնալով մաքսանենգ ճանապարհով «Իգլա» համալիրի ներկրման փաստին, կարծիք յայտնած է, թէ զէնքը Հայաստան կրնար բերուիլ այստեղէն այլ երկիր տեղափոխելու, կամ Հայաստանի մէջ օգտագործելու նպատակով:
Պաշտպանութեան նախկին նախարարը «Ազատութեան» հետ զրոյցին շեշտած է, որ «Իգլա» հրթիռային համալիրը կը կիրառուի ինքնաթիռներ եւ ուղղաթիռներ խոցելու համար, եւ կրնար օգտագործուիլ նաեւ քաղաքական նպատակով:
