Home ԳԱՂՈՒԹԱՅԻՆ Արցախը Հայութեան Ամրոցն Է

Արցախը Հայութեան Ամրոցն Է

by MassisPost

Արցախը ողջ հայութեան հոգսն է ու հպարտութիւնը:

Հոգսն է, որովհետեւ  ազատագրուած Արցախ աշխարհը, նորածին մանչուկի պէս  հոգատարութեան ու խնամքի կարիք ունի: Հպարտութիւնն է, որովհետեւ հենց Արցախում է անթեղուած բովանդակ հայ ազգի ազատատենչ ոգու, հայրենապաշտ մտքի ու Վահագնածին բազկի զօրաւոր խորհուրդը: Այս նուիրական գիտակցումով է ամենաօրհասական պահին ծնունդ առել «Հայրենիք» միութիւնը ու կոչուած է լուծելու ամենակենսական խնդիրները:

Ստեղծուելով համազգային զարթօնքի` արցախեան փրկաշարժման տարիներին, «Հայրենիք» միութիւնը կարողացաւ իր շուրջը համախմբել հայրենիքի ցաւով մտահոգ, հայրենիքի լուսաւոր ապագայի համար մաքառող նուիրեալների, ովքեր իրենց մէջ ունենալով ազգային լաւագոյն որակներ անխոնջ աշխատանքով իրենց արժանի ներդրումն են բերում հայրենիքի վերականգնման աստուածահաճոյ գործին: Արցախին սատարելու համար շատ ու շատ կազմակերպութիւններ ու միութիւններ են ստեղծուել ու, որոշ բարեգործական ծրագրեր իրականացնելով,  շատերը կամ թուլացրել են իրենց գործունէութիւնը կամ ընդհանրապէս դադարել են գործել: «Հայրենիք»-ը այն բացառիկ միութիւններից է, որը անկախ հանգամանքներից, հաւատարիմ մնալով իր որդեգրած ազգանպաստ ու հայրենաշեն գաղափարներին, շարունակաբար իրականացնում է ամենաառաջնային ծրագրեր:

Անկեղծօրէն պէտք է խոստովանել, որ «Հայրենիք» միութեան երկարամեայ, անխափան ու արդիւնաւէտ գործունէութեան գրաւականն է` ծրագրերի նպատակային ընտրութիւնն ու աշխատանքների ճիշտ կազմակերպումը, ազնիւ ու թափանցիկ գործունէութիւնը, անկեղծ ու հոգատար վերաբերմունքը հայրենիքի ու ժողովրդի հանդէպ: Մեր սկզբունքային առանձնայատկութիւններից ու առաւելութիւններից մէկն այն է, որ միութիւնը, հակառակ շատ ու շատ դժուարութիւնների, նախընտրում է ծրագրեր իրականացնել հեռաւոր գիւղերում, որոնք շատերի տեսադաշտից հեռու են ու ինչ-որ չափով լքուած եւ ունեն համայնքային հրատապ հիմնախնդիրներ:

Վերջերս, իրականացուող ծրագրերին ծանօթանալու նպատակով, Արցախ ժամանած պրն. Ալեքսանեանի եւ պրն. Բաշմակեանի հետ  այցելել էինք Շահմասուր գիւղ, որի համայնքի ղեկավար` Սլավա Բաղդասարեանն անկեղծօրէն ու յուզմունքով նշեց, որ «Հայրենիք» միութիւնն առաջինն       է ու միակը, որն իրենց գիւղում բարեգործական ծրագիր է իրականացնում: Իսկ ահա սահմանամերձ` Վազգէնաշէն գիւղի համայնքի ղեկավար  Անդրանիկ Բաբայեանը շեշտեց, որ ապրիլեան քառօրեայ պատերազմից անմիջապէս յետոյ «Հայրենիք» միութեան կողմից իրենց գիւղում իրականացուող ծրագրերը,  յուսալքութեան եւ ընկճուածութեան մէջ ընկած բնակիչների մօտ վստահութիւն ու լաւատեսութիւն են ներշնչել: Տարիներ շարունակ,  իրականացնելով բազմաբնոյթ ծրագրեր,  միութիւնը հետեւականօրէն վերահսկում է նրանց արդիւնաւէտ շահագործումը եւ հարկ եղած դէպքում`  նորից օգնութեան ձեռք մեկնում:

Արդ, վստահօրէն կարող ենք ասել, որ «Հայրենիք»  միութեան կողմից իրականացուող բարեգործական ծրագրերը ոչ միայն սոցիալ-կենցաղային խնդիրներ են լուծում այլեւ հեռաւոր, սահմանային, տնտեսապէս տկար գիւղերում ապագայի հանդէպ յոյս ու հաւատ են ներշնչում,  ինչը աւելի է ամրապնդում մեր երկրի սիրտը հանդիսացող հայկական պատմական գիւղերը:

«Հայրենիք» միութեան Արցախի ներկայացուցիչ`

Վահրամ Գէւորգեան

Հարակից Նյութեր

Leave a Comment