Փետրուար 14-ի երեկոյեան հրապարակուեցաւ Հայաստանի իշխող կուսակցութեան` ՀՀԿ համամասնական ցուցակը, ուր կային բազմաթիւ անակնկալներ:
Ցուցակը կը գլխաւորէ Պաշտպանութեան նախարար Վիգէն Սարգսեան: Սերժ Սարգսեանն ու վարչապետ Կարէն Կարապետեանը ցուցակին մէջ չկան:
ՀՀԿ գործադիր մարմնի նիստի աւարտին, Կուսակցութեան խօսնակ Էտուարտ Շարմազանով լրագրողներուն յայտնեց, որ հաստատուած է համամասնական ցուցակը` Վիգէն Սարգսեանի գլխաւորութեամբ: Յաջորդ տեղերը կը գրաւեն Տարօն Մարգարեան, Արփինէ Յովհաննիսեան, Արա Պապլոյեան եւ Արմէն Ամիրեան:
Առաջին տասնեակի մէջ են նաեւ Արմէն Աշոտեան, Էտուարտ Շարմազանով, Մարգարիտ Եսայեան, Սամուէլ Ֆարմանեան ու Կարէն Աւագեան: Ցուցակը բաղկացած է 64 անձէ:
Որոշուած է նաեւ, որ ՀՀԿ նախընտրական շտապը պիտի ղեկավարէ կուսակցութեան գործադիր մարմինը Սերժ Սարգսեանի գլխաւորութեամբ: Գործադիր մարմինը պիտի ղեկավարէ նաեւ նախընտրական քարոզչութիւնը:
Վարչապետ Կարէն Կարապետեանի անունը չկայ ՀՀԿ համամասնական ցուցակին մէջ, սակայն Շարմազանով յայտարարեց որ, եթէ խորհրդարանական ընտրութիւններուն ՀՀԿ-ն մեծամասնութիւն ունենայ, վարչապետը դարձեալ պիտի ըլլայ Կարէն Կարապետեանը: Իսկ ան ցուցակին մէջ չի ներառուած, քանի որ մշատական բնակութեան հարցը խոչընդոտած է անոր մասնակցութիւնը Ապրիլ 2-ին կայանալիք ընտրութիւններուն: