Home ՀԱՅԱՍՏԱՆ Վարչապետի Ընտանիքը 500 Հազար Տոլարի Ներդրում Կ’ընէ Գիւմրիի

Վարչապետի Ընտանիքը 500 Հազար Տոլարի Ներդրում Կ’ընէ Գիւմրիի

by MassisPost

Ուռբաթ օրը ՀՀ վարչապետ Կարէն Կարապետեան բազմաթիւ գործարարներու հետ Գիւմրի եկած էր՝ քաղաքի պատմական հատուածի՝ «Կումայրի» արգելոցին մէջ ներդրումներ կատարելու, հանրապետութեան հին քաղաքը զբօսաշրջութեան կեդրոն դարձնելու նպատակով:

Ներդրումները պէտք է սկսին «Կումայրի» արգելոց-թանգարանի տարածքին գտնուող երկու փողոցներու՝ Շիրազի ու Ռուսթավելիի վերանորոգմամբ: Ընդհանուր առմամբ նախատեսուած է 200 միլիոն տոլարի ներդրում կատարել «Կումայրի» արգելոցին, 10 միլիոն՝ «Շիրակ» օդակայանին մէջ:

Մինչ փողոց առ փողոց կը ցուցադրէին ու կը ներկայացնէին, թէ ինչ ձեւով պատկերացուցած են Գիւմրիի պատմական կորիզի վերականգնումը, զբօսաշրջութեան ու գործարքի զարգացումը, վարչապետը առաջինը ինքը ելոյթ ունեցաւ՝ գործարարներուն օրինակ ծառայելով, որ գումար ներդնեն պատմական այս քաղաքի զարգացման համար:

Վարչապետը, որ ամբողջ օրը ոտքով շրջագայած էր հին Գիւմրիի փողոցներով, զմայլած, Գիւմրիի արուեստագիտական կեդրոնին մէջ յայտարարեց, որ բարձր տրամադրութեամբ եկած է Գիւմրի, իր ընտանիքի անդամները նոյնպէս ներդրումներ պիտի կատարեն այս քաղաքին մէջ: «Ես ցաւօք սրտի, այսօր պիզնեսով զբաղուելու ժամանակ չունեմ, բայց խնդրել եմ իմ ընտանիքի անդամներին, որպէսզի իրենք էլ ներդրումներ անեն, մեր ընտանիքի համար շատ մեծ պատիւ կը լինի, որ ներդրումներ անեն Գիւմրիում», ըսաւ ան:

Իսկ ինչքան ներդրում կը պատրաստուին ընել վարչապետի ընտանիքը, լրագրողներու հարցին ի պատասխան՝ ան տեղեկացուց՝ 500 հազար տոլար:

Հարակից Նյութեր

Leave a Comment