Պէյրութի Հայկազեան Գոլէճը (Haigazian College) հիմնուած՝ Հոկտեմբեր 1955-ին, ապա արժանապէս կոչուած Haigazian University College (1992-1996), եւ Դեկտեմբեր 1996 թուականէն սկսեալ ճանչցուած որպէս Haigazian University Լիբանանի պետութեան կողմէ, եղած է ու կը մնայ սփիւռքահայ կեանքի ամէնէն բարձր ուսումնարանը եւ բոլորիս հպարտութիւն պատճառող հայկական համալսարանը։
Ամերիկահայ աւետարանական համայնքի եւ մասնաւորաբար երկու հաճընցիներու՝ Ստեփան Մեխակեանի ու Ստեփան Փիլիպպոսեանի անձնական ջանքերով եւ անոնց կողմէ եղած նիւթական ու բարոյական աջակցութեամբ, Պէյրութի մէջ հայ ուսուցիչ պատրաստելու վեհագոյն նպատակով ստեղծուած Հայկազեան Գոլէճը (կոչուած ի պատիւ Եղեռնի զոհ Տոքթ. Արմենակ Հայկազեանի՝ տնօրէնը Գոնիայի Ճենանեան ճեմարանի եւ ուսուցիչը Ստեփան Մեխակեանի եւ հայրը անոր կնոջ՝ Մարիի), եղած է նաեւ կնոջս՝ Սօսիիս ու իմ ծանօթավայրը, երբ երկուքս ալ, ինք գալով Երուսաղէմէն եւ ես ալ Թրիփոլիէն, հոն հանդիպեցանք 1966 թուականին։ Շատ մը մը հայորդիներ այդ գոլէճին մէջ հանդիպելով կամ ուսանելով եւ ազգային շունչով հոն տոգորուելով՝ դարձան աշխարհատարած ներկայութիւն ունեցող մասնագէտներ, ուսուցիչներ եւ ազգային գործիչներ։
Վերջերս մեծ հաճոյքով կարդացի Տոքթ. Ճան Մարգարեանի անգլերէնով գրուած գիրքը, որ կը կոչուի “The Thirsty Enemy, A Memoir”, որ ինծի տրուեցաւ յարգելի բարեկամ եւ վաստակաշատ, կարող Վերապատուելի Եսայի Սարմազեանի կողմէ։ Տոքթոր Մարգարեան եղած է առաջին տնօրէնը Հայկազեանի եւ հոն պաշտօնավարած է ամբողջ 22 տարի (1955-1966 եւ 1971-1982)։ Գիրքը կարդալէս ետք, յոյժ կարեւոր նկատեցի հայ ընթերցողին փոխանցելու կարգ մը հետաքրքրական կէտեր, որ վստահ եմ շատեր չեն գիտեր նախկին Հայկազեան Գոլէճի եւ այժմ համալսարանի մասին։
1.- Հայկազեան Գոլէճը անցեալ դարու վաթսունական թուականներուն, Մանուկ Մանուկեան ուսուցիչին առաջնորդութեամբ, հռչակաւոր դարձած է որպէս հրթիռներ արձակելու կարողութեամբ օժտուած աշակերտներու գոլէճ, միակն ու առաջինը ամբողջ Միջին Արեւելքի տարածքին։
2.- Հայկազեան Գոլէճը, որ 1955 թուականին ունէր միայն 43 աշակերտ, այժմ ունի մօտաւորապէս հազար հոգի հաշուող աշակերտութիւն, որոնք կու գան աշխարհի 20 տարբեր երկիրներէ։ Այժմ այդ համալսարանէն կը վկայուին արուեստի եւ գիտութեան չորս մարզերու մէջ, Bachelor of Arts եւ Bachelor of Sciences, ինչպէս նաեւ MBA աստիճանի վկայակականներով աշակերտներ։
3.- 1982 թուականին, Իսրայէլի կողմէ կատարուած Պէյրութի պաշարման շրջանին, Հայկազեանը, ըստ London Sunday Times հռչակաւոր շաբաթաթերթի թղթակիցին, եղած է յարատեւումը կարելի դարձնող (survival possible) կեդրոնը այդ քաղաքի կէս միլիոն մարդոց, երբ Հայկազեան Գոլէճի վարչակազմն ու աշակերտութիւնը դարձած են ամէնէն մեծ սննդամթերքի եւ այլազան կարեւոր պէտքերու բաշխումի կեդրոնները վարող անձնակազմը արեւմտեան Պէյրութի մէջ, 180 մթերանոցներէ հայթայթելով սնունդ 3000 ընտանիքի եւ ամբողջ քսան հազար հաշուող գաղթականներու։
4.- Լիբանանի ներկայ վարչապետ Թամմամ Սալամ եղած է Հայկազեան Գոլէճի աշակերտ՝ նախկին դարու վաթսունական թուականներու կէսերուն։ Ան եղած է քաղաքական տարբեր հոսանքներ ներկայացնող աշակերտներու տեսակ մը աշխատանոց եւ գործատեղի, հայ թէ ոչ-հայ, շարունակ իրարու հետ լեզու գտնելով եւ գոյակցելով, գոլէճի լայնախոհ ու համապարփակ շունչին տակ։
5.- Ամերիկայի Հայ Աւետարանչական Ընկերակցութեան (Armenian Missionary Association of America, որ կը ճանչցուի AMAA սկզբնատառերով) գործադիր տնօրէնը՝ Միհրան Ճանպազեանը (1987-2000) եղած է շրջանաւարտ Հայկազեան Գոլէճէն։ Անձնապէս լաւ ճանչցած ըլլալով զինք այդ Գոլէճին մէջ, կրնամ վկայել անոր հայաշունչ գործին եւ վաստակին աճումը այդ ազգային կրթարանէն ներս։
Ունեցած եմ ընկերներ ու ճանչցած եմ անձեր, որոնք դարձած են նախկին ու ներկայ վկայեալ հայորդի «հայկազեանցիներ»։ Բոլորն ալ ունին ազգային առողջ ջիղ, պատրաստ՝ հայօրէն ապրելու եւ մտածելու, բան մը, որ վստահաբար կը ցանկային տեսնել իրենց մէջ աւետարանական գոյնով ու կերպարով ազգասէր եւ ուսումնասէր կոչուող Գոլէճի հիմնադիրները։
Այսօր, հեռուէն հետեւելով եւ կարդալով Հայկազեան Համալսարանի կատարած առաջատար գործունէութեան մասին Պէյրութի մէջ, անոր բարձրորակ դասախօսական շարքերով եւ ամէնուն հետ սիրալիր յարաբերութիւններ ունենալու իմաստուն քաղաքականութիւն վարող տնօրէնին՝ Տոքթ. Փօլ Հայտոսթեանի կարող գնացքով եւ աշխատանքով, ամէն հայ ակնածանքով կը խոնարհի յիշատակին եւ գործին առջեւ բոլոր անոնց, որոնք, անցեալին ու ներկայիս, սփիւռքահայ մարմնին մէջ դրին ու տակաւին կը դնեն շունչը այս տեսակի առողջ կեանք շնորհող իրականութեան։