Օրեր առաջ իր լրումին հասաւ Սեւան Նշանեանի բանտարկութեան երրորդ տարին: Սեւան Նշանեանի ծանօթներէն վերահասու դարձանք, որ խօսքի ազատութեան համար պայքարող Index on Censorship («Գրաքննութեան ցուցակ») կազմակերպութիւնը հարցազրոյց ունեցած է Թուրքիա բանտարկուած պոլսահայ մտաւորական, լեզուաբան Սեւան Նշանեանի հետ: Հետազօտող Ճոն Պաթլերը Նշանեանի հետ հարցազրոյցը վերնագրած է`«Թուրքիա՝ Լեզուաբանը բանտարկուած է խօսքի ազատութեան համար»:
Նշանեան պատմած է, որ կը պահուի բանտային սարսափելի պայմաններու մէջ: «Մեր բանտարկեալներու շուրջ երկու երրորդը վերջերս տեղափոխուած են այլ վայրեր, իսկ մնացեալը տարուած են խիտ բնակեցուած խուցեր, որպէսզի սենեակներ պատրաստուին երկրի ձախողած յեղաշրջման փորձէն յետոյ ձերբակալուած հազարաւոր մարդկանց համար»,- ըսած է պոլսահայ մտաւորականը:
իր կարգին Պաթլըր գրած է, որ Նշանեանի հետապնդումները սկիզբ առած են 2012-ին, երբ ան իր պլոկին մէջ գրառում կատարած էր խօսքի ազատութեան մասին` խօսելով Մոհամմէտ մարգարէին քննադատելու իրաւունքի մասին: Այդ օրուան արդարադատութեան նախարարը ելոյթ ունենալով, յայտարարած է, որ մարգարէին վիրաւորելու ոչ մէկ փորձ անպատիժ պիտի մնայ: «Մտահոգ քաղաքացիներու» խումբերը Նշանեանի դէմ դատական գործեր յարուցած են Թուրքիոյ գրեթէ բոլոր 81 նահանգներուն մէջ:
Հեղինակը փաստած է, որ անոնցմէ յետոյ Նշանեանի հետ կատարուածը աւելի դաժան եղած է: Գտնուելով բանտին մէջ` անոր դէմ ներկայացուած է 11 դատական հայց՝ Շիրինճէ գիւղին մէջ «ապօրինի» շինարարութիւն իրականացնելու համար: Այն այժմ մշակութային ժառանգութիւն կը համարուի եւ յայտնի զբօսաշրջային կեդրոն է:
«Այս բոլոր մեղադրանքներուն համար ան դատապարտուեցաւ 16 տարի եւ 7 ամիս ազատազրկման»,- գրած է Պաթլըր: Անոր կարծիքով Նշանեանի դէմ կատարուածը քաղաքական հետապնդման արդիւնք է:
«Իսլամական զգայուն թեմաներու դէմ խօսելու համար ոչ իսլամին, հայուն բանտարկելը առաջին նմանօրինակ դէպքն է Թուրքիոյ Հանրապետութեան մէջ»,- ըսած է Նշանեան: Չնայած ամէն ինչին` ան վստահ է, որ ժամանակը անիմաստ չէ վատնած: Նշանեան ներկայիս կ’աշխատի թրքերէնի ստուգաբանական բառարանի երրորդ հրատարակութեան եւ տարբեր հատորներու վրայ: