Հայաստանի ֆութպոլի հաւաքականի եւ «Մանչեսթր Եունայթըտ»-ի կիսապաշտպան Հենրիկ Մխիթարեանը այսօր «Եունիսեֆ»-ի կողմէ նշանակուեցաւ Հայաստանի բարի կամքի դեսպան:
27-ամեայ Մխիթարեանը երկարատեւ դադարէ յետոյ այսօր Երեւանի լրագրողներուն հետ հանդիպման մեկնաբանեց յիշեալ ակումբի կազմին մէջ իր՝ քիչ խաղաժամանակ ստանալը, ըսելով՝ «ոչինչ չի կարող խանգարել իրականացնել երազանքս, եթէ հիմա յանձնուեմ՝ ամէն ինչ կարող է ջուրն ընկնել: Դրա համար փորձում եմ իմ մէջ ուժ գտնել եւ ոչ թէ համակերպուել, այլ պայքարել»:
Մխիթարեանը այժմ Հայաստան է՝ երկու օրէն աշխարհի 2018 թուականի առաջնութեան նախընտրական փուլին Մոնթենեկրոյի հաւաքականի հետ խաղին մասնակցելու համար:
Ան անդրադարձաւ նաեւ օրեր առաջ Հայաստանի ֆութպոլի ազգային հաւաքականի գլխաւոր մարզիչի պաշտօնին Արթիւր Պետրոսեանի նշանակման, ընդգծելով, որ իրեն համար Պետրոսեանը հայկական ֆութպոլի լաւագոյններէն է, եթէ ոչ լաւագոյնը:
ֆութպոլի ակադեմիայի մէջ լրագրողներու հետ այսօրուան հանդիպումը նախաձեռնած էր ՄԱԿ-ի մանկական հիմնադրամը՝ «Եունիսեֆը»: Ամբողջ աշխարհի երեխաներու իրաւունքներու պաշտպանութեամբ զբաղող հիմնադրամը իր 70-ամեակի առիթով Հենրիկ Մխիթարեանին նշանակեց Հայաստանի բարի կամքի դեսպան: Հայաստանի ֆութպոլի հաւաքականի աւագը յայտարարեց՝ «Եունիսեֆ»-ի հետ աշխատելով՝ պիտի ընէ հնարաւոր ամէն ինչ՝ երեխաներուն օգտակար ըլլալու համար:
««Եունիսեֆ»-ի հետ իմ համագործակցութեան յենասիւնը լինելու է կրթութեան ոլորտը: Ցաւալի է գիտակցել, որ այսօր ոչ բոլոր երեխաները դպրոց յաճախելու եւ կրթուելու հաւասար հնարաւորութիւններ ունեն»,- իր նոր տիտղոսը ստանալու առնչութեամբ, մասնաւորապէս, ըսաւ Հենրիկ Մխիթարեանը:
Աշխարհի մէջ «Եունիսեֆի» բարի կամքի դեսպաններ են նաեւ այնպիսի յայտնի ֆութպոլիստներ, ինչպիսին են՝ արժանթինցի Լէօ Մեսսին եւ անգլիացի Տէյվիտ Պեքհամը: Տարիներ առաջ Հայաստանի մէջ «Եունիսեֆի» բարի կամքի դեսպան նշանակուած էր նաեւ երգչուհի Ալլա Լեւոնեանը:
