Տրեզտենի սիմֆոնիք նուագախումբի «Աղէտ» խորագրով համերգը՝ նուիրուած Հայոց ցեղասպանութեան զոհերու յիշատակին, 10 Նոյեմբերին կ′ունկնդրէ նաեւ հայ հանդիսատեսը: 2015-ին մեկնարկած համերգային ծրագիրը արդէն կայացած է Տրեզտենի, Պեռլինի, Պրանտենպուրկի մէջ: Երեւանեան համերգէն յետոյ՝ 13 Նոյեմբերին, համերգ մը նախատեսուած էր նաեւ Ստամբուլ, սակայն այն չեղարկուած է Գերմանիոյ արտաքին գործերու նախարարութեան կողմէն: Լրագրողներու հետ հանդիպման ժամանակ Տրեզտենի սիմֆոնիք նուագախումբի տնօրէն Մարկուս Ռինդտը, խմբավար Անտրիա Մոլինոն եւ երգահան Վաչէ Շարաֆեանը ներկայացուցին ծրագրի մանրամասները:
Վաչէ Շարաֆեանի խօսքով՝ այս նախաձեռնութիւնը բաւականին խիզախ ծրագիր է. «Էրտողանը մի քանի անգամ դիմել է Գերմանիայի իշխանութիւններին, որպէսզի այն փակուի, իսկ վերջերս Թուրքիայում չեղարկուեց համերգը: Էրտողանի ընդվզումը լայն արձագանք գտաւ գերմանացիների շրջանում, ինչից մէկ ամիս անց, փաստօրէն, Պունտեսթակը ընդունեց Հայոց ցեղասպանութիւնը ճանաչող բանաձեւը»,- ըսաւ ան՝ աւելցնելով, որ Գերմանիոյ արտգործնախարարութիւնը Ստամբուլի մէջ չեղարկեց համերգը անկէ ետք, երբ Մարկուս Ռինդտը Էրտողանին հրաւիրեց այդ համերգին:
Մարկուս Ռինդտն ալ աւելցուց, որ արտգործնախարարութիւնը վախցաւ նոր խնդիրներէ, անոր համար գնաց այդ քայլին. «Մեր կարծիքով՝ Գերմանիայի իշխանութիւնները թոյլ տուեցին նոյն սխալը, ինչ 101 տարի առաջ, երբ ոչինչ չարեցին՝ կանգնեցնելու համար Ցեղասպանութիւնը»,- նշեց ան՝ աւելցնելով, որ Ստամբուլէն իրենց ըսած են՝ համերգասրահը այլեւս ազատ չէ անոնց համար:
«Աղէտ» համերգը տեղի կ′ունենայ 10 Նոյեմբերին, ժամը 19:00-ին՝ Արամ Խաչատրեան համերգասրահին մէջ: Ծրագրին ներկայացուած են թուրք երգահան Զէյնապ Կետիզլիօղլուի, Հելմուտ Օհրինկի եւ Վաչէ Շարաֆեանի ստեղծագործութիւնները:
