Ատրպէյճանի պաշտպանութեան նախարարութիւնը, ինչպէս կը գրէ ռուսաստանեան «Նեզավիսիմաեա Կազեթան», բուռն բանակցութիւններ կը վարէ Փաքիստանի հետ 500 քիլոմեթր հեռահարութեամբ հրթիռային համակարգեր ձեռք բերելու շուրջ:
Ատրպէյճանի հրթիռային եւ հրետանային զօրքերու հրամանատար, կեներալ-մայոր Զահիտ Հուսեյնովը յայտարարած էր, թէ «երկրի յուսալի պաշտպանութեան համար անհրաժեշտ է ձեռք բերել 200, 300 եւ 500 քիլոմեթր հեռահարութեամբ օպերատիւ-տակտիկական հրթիռներ»՝ ընդգծելով, «Սա ամենեւին էլ չի նշանակում, որ հակառակորդի յարձակումները կասեցնելու համար անհրաժեշտ համակարգեր Ատրպէյճանն այսօր չունի: Ատրպէյճանն ունի բաւականաչափ սպառազինութիւն հակառակորդի ցանկացած օպյեքթ խոցելու համար»:
Նոր հրթիռներ ձեռք բերելը Ատրպէյճանի համար արդիական դարձած է Հայաստանի անկախութեան տօնին նուիրուած զօրահանդէսին ցուցադրուած ռուսաստանեան գերժամանակակից «Իսկանդեր» հրթիռային համակարգը:
Փաքիստանի հետ սպառազինութեան համատեղ արտադրութեան սկսելու մտադրութեան մասին պաշտօնական Պաքուն յայտարարած էր անցեալ տարուան Մարտին, երբ Ատրպէյճան ժամանած էր Փաքիստանի վարչապետ Նաուազ Շարիֆը: Խօսքը Ատրպէյճանի ռազմաարդիւնաբերական ոլորտ կէս միլիարդ տոլար ներդնելու Փաքիստանի մտադրութեան մասին է:
Փաքիստանի վարչապետը այդ այցի ընթացքին յայտարարած է, «Մենք կողմ ենք Ատրպէյճանի բոլոր գրաւեալ տարածքների, այդ թուում նաեւ Լեռնային Ղարաբաղի, ազատագրմանը»:
Ռազմական նոր արուեստագիտութիւններ ձեռք բերելու շուրջ բանակցութիւններ Ատրպէյճանը այսօր կը վարէ նաեւ Ռուսաստանի, Թուրքիոյ եւ Իսրայէլի հետ: Մասնաւորապէս, Իսրայէլէն, ըստ «Նեզավիսիմաեա Կազեթայի», Ատրպէյճանը մտադիր է ձեռք բերել հակա-օդային պաշտպանութեան համակարգ:
Փորձագէտներու կարծիքով, «Իսկանդեր» գերժամանակակից համակարգը այսօր դեռ անհասանելի է յայտնի բոլոր հակահրթիռային համակարգերու համար: