2017-ին Հայաստանի արտաքին պարտքը կը հասնի 5 մլր 217 մլն տոլարի (ակնկալուող ՀՆԱ-ի 45․8 տոկոսը-խմբ)։ Այս մասին 31 Հոկտեմբերին յայտնեց տնտեսութեան նախարար Վարդան Արամեանը՝ 2017-ի պետ-ելեւմտացոյցի նախագծի շուրջ խորհրդարանական լսումներու ժամանակ իր ելոյթի ընթացքին։ Անոր համար ալ Հայաստանը պիտի սկսի աւելի զուսպ ըլլալ վարկեր վերցնելու հարցով, նկատեց ան։
Հայաստանի պետական պարտքը (Կառավարութեան արտաքին ու ներքին պարտքը ու ԿԲ պարտքը) 2017-ի արդիւնքներով կ′ակնկալուի 6 մլր 277 մլն չափով (ՀՆԱ 55․1 տոկոսը ըստ հաշուարկային փոխարժէքի, որ ամրագրուած է ելեւմտացոյցի նախագծին մէջ)։ Պետական պարտքի 83․1 տոկոսը արտաքին պարտքն է։
2014-2016-ի ՀՆԱ–ի նկատմամբ պետական պարտքի մակարդակը աճած է 16 տոկոսային կէտով՝ 38․3 տոկոսէն բարձրանալով 54․5 տոկոսի (որ կ′ակնկալուի տարեվերջին, արտարժոյթի տատանումներով պայմանաւորուած հնարաւոր փոփոխութեամբ)։ Պետութիւնը նոր վարկեր վերցուցած է, որպէսզի աշխուժացնէ տնտեսութիւնը Ռուսաստանի տնտեսական դրութեան վատացման ու մետաղի գիներու անկման ֆոնին։
«2017-ին ու հետագայ տարիներին հանրապետութիւնը կը դառնայ աւելի պահպանողական վարկառու, որպէսզի խուսափի պարտաւորութիւնների հետագայ աճից»,- աւելցուց նախարարը։
2016-ի արդիւնքներով կ′ակնկալուի ներգրաւել 550 մլն տոլարի փոխառութիւններ, որոնցմէ 467 մլն-ը՝ Կառավարութեան համար, 83 մլն-ը՝ ԿԲ-ի։ 2017-ին կ′ակնկալուի ներգրաւել 449 մլն տոլար, որոնցմէ 373 մլն-ը՝ Կառավարութեան համար։
2016-ի արդիւնքներով Հայաստանը արտաքին պարտքի մարման նպատակով կը յատկացնէ մօտ 234 մլն տոլար, որմէ 71 մլն-ը ՝ մայր գումարը, իսկ 120 մլն-ը՝ տոկոսները մարելու համար։
2017-ին այդ նոյն նպատակներու համար կը ծրագրուի յատկացնել 296 մլն տոլար, որմէ 145 մլն-ը մայր գումարի ու 151 մլն-ը՝ տոկոսներու մարման համար։
