Վարչապետ Յովիկ Աբրահամեանի հրաժարականի նկատմամբ, ԱԺ Սոցիալական հարցերու յանձնաժողովի նախագահ, ՀՀԿ-ական Յակոբ Յակոբեան ըսաւ.- «Կը կարծեմ, որ նախկին վարչապետ Յովիկ Աբրահամեանը եւ վաղուան վարչապետը, կը կիսեն իրենց մօտեցումները, որովհետեւ երկուքին նպատակն ալ նոյնն է, որ վաղուան քաղաքացին զգայ փոփոխութիւն սեփական մաշկի վրայ»:
Տիգրան Սարգսեանէն յետոյ, Յովիկ Աբրահամեանի վարչապետութեան շրջանին փոփոխութիւններուն մասին Յակոբ Յակոբեան ըսաւ.- «Որպէս Սոցիալական հարցերու յանձնաժողովի նախագահ կրնամ ըսել հետեւեալը. փոփոխութիւնները մարդ իր մաշկին վրայ կրնայ զգալ գոնէ 10 տարուան ընթացքին: Երբ ինծի հարցնեն, թէ՝ երբ կը կրճատուի աղքատութիւնը, ես կը պատասխանեմ՝ աղքատութիւնը երկար պէտք է կրճատուի: Մեր ՀՆԱ-ն եթէ այսօր 11 մլ րդ տոլար է, գոնէ պէտք է դառնայ 15 մլ րդ տոլար, որ մենք մեր աչքով տեսնենք աղքատութեան կրճատումը»:
Ան յայտնեց, որ քաղաքական ուժերը բարոյական առումով պարտաւոր են մաս կազմել նոր ձեւաւորուելիք ազգային համաձայնութեան կառավարութեան:
Ազգային համաձայնութեան կառավարութեան ձեւաւորման մասին Սերժ Սարգսեանը խօսեցաւ, «Սասնայ Ծռեր»-ու գործողութենէն յետոյ, հարցական է, թէ Սարգսեան այդ փոփոխութիւնը կ՛ընէ՞ր, եթէ տեղի չունենար ՊՊԾ գունդի գրաւումը, ՀՀԿ-ական պատգամաւորը ըսաւ.- «Հասարակութեան մէջ բեւեռացումները, կուտակուող հակասական յարաբերութիւնները, որոնց իբր արդիւնք կը ծնին նոր երեւոյթներ: Իմ կարծիքով, ՊՊԾ գունդի հետ կապուած «Սասնա Ծռեր»ու գործողութիւնը արագացուց այս ամէն ինչը: Եթէ չ՛ըլլար նման գործողութիւն, այս արդիւնքին կը հասնէինք 3 կամ 4 տարի յետոյ: Նախագահը յայտարարեց, ազգային համաձայնութեան կառավարութեան ձեւաւորման մասին, որպէսզի կառավարման համակարգին մէջ հասարակութեան բեւեռացուած տարբեր շերտերու ընդգրկումով կարենանք հանել այդ բեւեռացումը»:
Կարէն Կարապետեանի, ՀՀ վարչապետ նշանակման լուրերուն մասին, Յակոբ Յակոբեան յայտնեց.- «Իմ գնահատականը չէ, բայց հասարակութեան գնահատականը՝ դրական է»:
Իշխանութիւնը շուտով կը փոխուի
«Սասնայ Ծռեր» զինուած խումբի անդամ՝ Պաուէլ Մանուկեան, յայտնեց, թէ ինքզինք գերազանց կը զգայ, եւ իր առաքելութիւնը տակաւին աւարտած չի համարէր: Ան ըսաւ.- «Նոր սկսէր ենք, մինչեւ չի տեսնենք ապահով, ազատ եւ ինքնաբաւ Հայաստան, սակայն տակաւին չենք հասած մեր նպատակին»: Նշենք, որ այսօր կէսօրին «Դատապարտեալներու հիւանդանոց»-էն, տեղափոխուեցաւ «Էրեբունի» բժշկական կեդրոն, ուր յետազոտութիւններէն յետոյ, հաւանաբար վաղը, կ՛ենթարկուի ոտքի երկրորդ վիրահատութեան եւ կը տեղադրուի մետաղական հարթակ ։
Պաուէլ Մանուկեանի սկզբունքներուն համաձայն, պէտք է երկրին մէջ փոփոխութիւններ ըլլան, մանաւանդ «Սասնայ Ծռեր»-ու ստեղծած իրավիճակէն ետք: «Մեր պատկերացմամբ, իշխանութիւնը շուտով կը փոխուի, որովհետև պատահական փոփոխութիւնները, որեւէ արդիւնքի չեն հասցնէր»,- յայտնեց Մանուկեանի փաստաբան՝ Յարութիւն Պաղտասարեան, մատնանշելով վարչապետին հրաժարականին:
Ըստ փաստաբանին, Մանուկեան լուրջ մարմնական վնասուածք ստացած էր, քանի որ անոր ազդոսկրը հրազէնային վիրաւորումէ, փշրուեր է: